Pedwar gweithiwr Cwmni Hyfforddiant blaenllaw yn dathlu llwyddiant prentisiaethau
Rheolwr Gyfarwyddwr Cwmni Hyfforddiant Cambrian, Faith O’Brien (canol) gyda graddedigion (o’r chwith) Alex Hogg, Sharon Roberts, Manon Rosser ac Iestyn Evans.
Mae pedwar gweithiwr o ddarparwr dysgu seiliedig ar waith blaenllaw yng Nghymru wedi dilyn ei bregeth ei hun trwy wella eu sgiliau a’u datblygiad proffesiynol.
Dathlwyd cyflawniadau Alex Hogg, pennaeth technoleg gwybodaeth, Sharon Roberts ac Iestyn Evans, swyddogion hyfforddiant, a Manon Rosser, Swyddog Cymorth y Gymraeg a Chyfathrebu yn seremoni raddio prentisiaethau’r hydref Cwmni Hyfforddiant Cambrian yr wythnos ddiwethaf.
Mae Alex, 43, wedi cyflawni Prentisiaeth Gradd Baglor mewn Gwyddoniaeth (Anrhydedd) Dosbarth Cyntaf mewn Peirianneg Meddalwedd Gymhwysol gyda’r Brifysgol Agored, gan gydnabod ei ymrwymiad i ddysgu gydol oes.
Ar ôl weithio i Gwmni Hyfforddiant Cambrian yn y Trallwng am 17 mlynedd, mae wedi cydbwyso ei rôl yn rheoli TG a dadansoddi data gyda phedwar blynedd o amser astudio academaidd wythnosol.
“Doeddwn i ddim yn meddwl fy mod i’n academaidd ac roeddwn i’n synnu i gael anrhydeddau dosbarth cyntaf,” meddai Alex. “Mae’r radd yn meincnodi fy sgiliau ac yn rhoi hwb i’m hyder.”
Trwy gydol ei astudiaethau, defnyddiodd Alex ei ddysgu yn uniongyrchol er budd y busnes, gan ddatblygu sawl rhaglen meddalwedd pwrpasol sydd wedi symleiddio prosesau mewnol – o dreuliau i deithio – gan arbed amser staff a gwella effeithlonrwydd.
Mae ei rôl yn ganolog i lwyddiant gweithredol y cwmni, gan sicrhau dadansoddi data ac adrodd cywir i fodloni contract prentisiaeth gwerth £8 miliwn gyda Llywodraeth Cymru.
Mae cwblhau prentisiaeth uwch mewn Ymarfer Cyfieithu wedi agor drysau i’r raddedig, Manon, a ddaeth yn Llysgennad Prentisiaethau gyda’r Coleg Cymraeg, ac sydd bellach yn helpu prentisiaid eraill i ddod yn un hefyd.
Yn raddedig Gwleidyddiaeth a Hanes Modern, cwblhaodd ei phrentisiaeth gyda Choleg Gŵyr Abertawe ynghyd â chymhwyster Llythrennedd Digidol Lefel 3.
“Fy nod nawr yw defnyddio fy sgiliau i helpu Hyfforddiant Cambrian i gyfrannu at nod Llywodraeth Cymru o gyrraedd miliwn o siaradwyr Cymraeg erbyn 2050,” meddai.
“Mae prentisiaethau yn gynhwysol, hyblyg ac wedi’u teilwra i ddulliau dysgu yn y byd go iawn, yn enwedig i’r rhai sy’n ffynnu’n well mewn amgylchedd dysgu mwy ymarferol. Maent yn cynnig dull personol, hyblyg sy’n grymuso dysgwyr i ffynnu.”
Mae Sharon, sy’n byw ger Abbergavenny, wedi cwblhau Prentisiaeth mewn Rheoli ac mae’n ei hychwanegu at gyfres o gymwysterau eraill, gan gynnwys Prentisiaeth Uwch mewn Arwain Sicrhau Ansawdd Asesu Mewnol.
Yn swyddog hyfforddiant a swyddog sicrhau ansawdd mewnol mewn gweithgynhyrchu bwyd a diod, cofrestrodd ar gyfer y brentisiaeth i wella dealltwriaeth o ddulliau rheoli ac i helpu i reoli ei llwyth achosion.
“Mae’r profiad hwn wedi rhoi cipolwg i mi o’r strwythurau rheoli o fewn y cwmni,” meddai Sharon. “Fy nod yw defnyddio’r cymhwyster yn effeithiol.”
Mae hi wedi gweithio i Gwmni Hyfforddiant Cambrian am 10 mlynedd, gan ddarparu fframweithiau sy’n gysylltiedig â bwyd a diod a sicrhau safonau ansawdd.
Graddiodd Iestyn, 56, sy’n byw yng Nghaerffili, gyda Phrentisiaeth Uwch mewn Dysgu a Datblygu sy’n cefnogi ei waith fel swyddog hyfforddi gweithgynhyrchu bwyd a diod.
Ar ôl graddio o King’s College, Llundain, gyda Gradd mewn Fferylliaeth, roedd Iestyn yn rhedeg ei siop fferyllfa ei hun yng Nghaerfyrddin tan ei 30au hwyr pan benderfynodd ymgymryd â her newydd fel mentor Tîm Troseddwyr Ifanc Caerdydd.
Ar ôl hynny, hyfforddodd fel cigydd gyda Chris Hayman Butchers, Maesycwmer, cyn ymuno â Chwmni Hyfforddiant Cambrian pum mlynedd yn ôl i rannu ei sgiliau a’i wybodaeth gyda phrentisiaid.
“Rwyf wrth fy modd ag amrywiaeth fy ngwaith pob dydd,” esboniodd Iestyn. “Mae pobl ifanc weithiau’n derbyn enw drwg ond rwy’n eu gweld nhw’n eithaf anhygoel, ar y cyfan. Rwy’n mwynhau ymgysylltu â phrentisiaid a’u cyflogwyr yn y gweithle.
“Mae cyflawni prentisiaeth uwch wedi gwella fy rôl o fod yn aseswr i athro, ac mae wedi rhoi’r wybodaeth i gefnogi fy sgiliau ymarferol. Mae wedi gwneud i mi hunan-fyfyrio a dadansoddi’r hyn y gallaf ei wneud i wneud fy mhrentisiaid yn well yn eu swyddi.”
Llongyfarchodd Faith O’Brien, rheolwr gyfarwyddwr Cwmni Hyfforddiant Cambrian, y pedwar graddedig a dywedodd:
“Rydym yn ymrwymedig i sicrhau bod pob aelod o’n tîm yn cynnal y wybodaeth ddiweddaraf am y sector. Nid yw buddsoddiad parhaus mewn datblygiad proffesiynol yn ddigwyddiad untro – mae’n rhan graidd o’n diwydiant ac yn addewid rydym yn ei gynnal trwy gydol taith pob cydweithiwr gyda ni.
“Mae eu taith yn dangos pa mor bwerus y gall prentisiaethau fod: datgloi potensial, magu hyder, a chreu effaith go iawn, parhaol ar draws y busnes.”
More News Articles
« Pum ffordd y gall busnesau yng Nghymru fod yn fwy gwyrdd (a pham mae hyfforddiant yn allweddol) — Cymwysterau Cymru yn lansio ymgynghoriad i helpu siapio dyfodol cymwysterau Sgiliau Hanfodol Cymru »
