Buddsoddi mewn pobl: adeiladu gweithlu cryfach ar gyfer y dyfodol
English | Cymraeg
Sesiwn hyfforddiant Educ8 Training ar y gweill
Yn y gweithle sy’n newid yn gyflym heddiw, y sefydliadau sy’n buddsoddi yn eu pobl sydd yn y sefyllfa orau i ffynnu. Wrth i dechnoleg ddatblygu, disgwyliadau cwsmeriaid newid a gofynion sgiliau newydd ddod i’r amlwg, ni ellir bellach ystyried datblygu’r gweithlu yn weithgaredd un-tro. Rhaid iddo fod yn fuddsoddiad parhaus mewn pobl, sgiliau a dilyniant.
Dyma lle gall cydweithio rhwng cyflogwyr a darparwyr hyfforddiant chwarae rhan bwysig. Mae dysgu yn y gwaith yn rhoi cyfle i weithwyr ennill sgiliau newydd a chymwysterau a gydnabyddir yn genedlaethol, wrth barhau yn eu rolau presennol, gan eu galluogi i ddefnyddio gwybodaeth newydd yn uniongyrchol yn eu cyfrifoldebau o ddydd i ddydd.
I gyflogwyr, gall y dull hwn helpu i feithrin gallu o fewn y sefydliad, cefnogi cadw talent a chreu llwybrau dilyniant cliriach. I unigolion, gall ddarparu’r hyder a’r sgiliau sydd eu hangen i gymryd y cam nesaf yn eu gyrfa.
Mae datblygu’r gweithlu’n effeithiol yn seiliedig ar greu diwylliant lle mae dysgu’n cael ei annog, ei gefnogi a’i gysylltu â nodau ehangach y sefydliad. Pan fydd pobl yn teimlo bod eu datblygiad yn cael ei werthfawrogi, gall dysgu ddod yn rhan o ddiwylliant sefydliad yn hytrach na rhywbeth sy’n digwydd ochr yn ochr â gwaith.
Rydym yn gweld effaith hyn drwy ein gwaith gyda chyflogwyr ledled Cymru, ac mae’r partneriaethau mwyaf effeithiol yn aml yn rhai lle mae’r cyflogwr a’r darparwr hyfforddiant yn rhannu ymrwymiad gwirioneddol i ddatblygu eu gweithlu.
Mae ein partneriaeth â Monmouthshire Building Society yn un enghraifft o’r dull hwn ar waith. Mae Monmouthshire Building Society wedi hyrwyddo diwylliant lle mae datblygiad personol a phroffesiynol yn cael ei annog yn weithredol, gyda mentrau fel Academi Gymunedol y Gymdeithas yn agor cyfleoedd ar gyfer dysgu, datblygu a dilyniant gyrfaol o fewn cymunedau lleol.
I lawer o ddysgwyr, mae prentisiaethau yn cynnig llawer mwy na chymhwyster, gan gynyddu hyder, cynnig safbwyntiau newydd a rhoi cyfle i gyflawni uchelgeisiau a allai fod wedi ymddangos y tu hwnt i’w cyrraedd ar un adeg.
Fel yr eglura Katrina Stewart, Partner Talent a Dysgu yn Monmouthshire Building Society:
‘Ar ôl cael trafferth yn yr ysgol fy hun, mae prentisiaethau wedi dod yn un o’m hoff feysydd. Rwy’n deall o brofiad uniongyrchol yr effaith gadarnhaol y gallant ei chael ar hyder, gwybodaeth a dilyniant gyrfa rhywun. Fe wnaeth fy nhaith ddysgu fy hun fy ysbrydoli i ddod yn Asesydd, ac mae’n parhau i fod yn fraint cefnogi eraill i gyflawni eu potensial.
Mae’r angerdd hwnnw wedi parhau i dyfu drwy fy ngwaith gyda dysgwyr ein Hacademi ar gyfer cydweithwyr, lle rwyf wedi gweld pobl yn datblygu sgiliau a gwybodaeth werthfawr y gallant eu defnyddio yn eu gyrfaoedd yn y dyfodol. Fel Partner Talent a Dysgu, rwy’n falch o gefnogi cydweithwyr gyda’u dyheadau, beth bynnag y boent.
Nid yw gyrfaoedd yn dilyn llwybr syml bob amser, a gall datblygiad personol fod yr un mor unigryw. Mae taith pawb yn wahanol, ond gyda’r gefnogaeth a’r gred gywir, gallwch gyflawni mwy nag y gallech feddwl. Eich llwybr chi fydd yr un sy’n iawn i chi, felly peidiwch â gadael i neb ddweud wrthych na allwch wneud rhywbeth. Rhowch gynnig arni – efallai y byddwch yn darganfod eich bod wrth eich bodd â’r daith ddysgu.’
Mae profiad Katrina yn adlewyrchu pwynt ehangach: nid yw datblygiad pobl yn dilyn un llwybr penodol. Mae angen i ddatblygu’r gweithlu’n effeithiol gydnabod gwahanol uchelgeisiau, mannau cychwyn a chamau gyrfa, gan roi’r gefnogaeth a’r anogaeth i bobl barhau i ddysgu.
Dyma pam nad yw cydweithio ar draws diwydiant erioed wedi bod yn bwysicach. Wrth i sefydliadau wynebu technolegau sy’n esblygu, disgwyliadau cwsmeriaid sy’n newid a gofynion sgiliau newydd, rhaid i ddatblygu’r gweithlu fod yn fuddsoddiad parhaus. Mae partneriaethau strategol rhwng cyflogwyr a darparwyr dysgu yn galluogi sefydliadau i feithrin gallu o fewn y sefydliad, cadw talent a chreu llwybrau dilyniant i staff.
Mae budd ehangach hefyd. Pan fydd cyflogwyr yn buddsoddi yn eu pobl, gall yr effaith ymestyn y tu hwnt i’r gweithle. Mae dysgwyr yn ennill hyder, cymwysterau a chyfleoedd gyrfa. Mae cyflogwyr yn datblygu gweithlu medrus a brwdfrydig. Mae cymunedau’n elwa ar sefydliadau lleol cryfach sydd wedi ymrwymo i dwf a datblygiad.
Yn y pen draw, mae buddsoddi mewn pobl yn ymwneud â chydnabod bod sefydliad llwyddiannus a gweithlu llwyddiannus yn agos gysylltiedig. Mae gan ddarparwyr hyfforddiant rôl i’w chwarae, ond felly hefyd cyflogwyr, rheolwyr ac unigolion eu hunain. Pan fydd y gwahanol rannau hyn yn gweithio gyda’i gilydd, gall dysgu ddod yn sbardun gwirioneddol i ddatblygiad personol, sefydliadol ac economaidd ehangach.
Mae’r bartneriaeth rhwng Educ8 Training a Monmouthshire Building Society yn un enghraifft o sut y gall hyn edrych yn ymarferol. Ond y cyfle ehangach yw i sefydliadau ledled Cymru weld datblygu’r gweithlu nid fel menter un-tro, ond fel buddsoddiad parhaus yn y bobl a fydd yn siapio eu dyfodol.
Ann Nicholas, Cyfarwyddwr Cyfrifon Cwsmeriaid Educ8 Training
Gan Ann Nicholas, Cyfarwyddwr Cyfrifon Cwsmeriaid Educ8 Training
