Prentis yn profi twf personol a phroffesiynol gyda chymhwyster TG
Mae Ysabela Dalumpines, peiriannydd darparu gwasanaethau yn y Gwasanaethau Rheoliadol a Rennir (SRS) yng Nghyngor Bwrdeistref Sirol Torfaen, wedi dod o hyd i fwy o hyder yn ei swydd diolch i brentisiaeth gydag ALS.
Mae Ysabela yn gweithio ar y ddesg gymorth fel y pwynt cyswllt cyntaf ar gyfer yr SRS ac yn ddiweddar mae wedi cwblhau diploma Lefel 4 mewn Cymhwysedd Proffesiynol ar gyfer Gweithwyr Proffesiynol TG a Thelathrebu Proffesiynol.
“Roedd y cwrs a’r unedau ynddo yn berthnasol iawn i fy swydd,” esboniodd Ysabela. “Rwyf wedi ennill sgiliau a gwybodaeth newydd mewn moeseg broffesiynol ac ymwybyddiaeth ddeddfwriaethol, a datblygiad personol.
“Mae wedi fy helpu i wella fy sgiliau ymgynghori a gallaf gynnig cyngor arbenigol i gwsmeriaid ynglŷn â’u problemau a’u ceisiadau. Mae hefyd wedi fy helpu i feithrin perthnasoedd cryf â chwsmeriaid a gwella darpariaeth gwasanaethau trwy raeadru awgrymiadau i fy rheolwyr llinell.”
Mae Ysabela yn credu bod y cymhwyster nid yn unig wedi hyrwyddo ei gyrfa ond hefyd wedi meithrin ei thwf personol. Wrth gwblhau’r cwrs, fe’i cymhwysodd i symud i fyny’r raddfa, gan gynyddu ei photensial ennill a rhoi hwb i’w hyder a’i chynhyrchiant yn y gwaith.
Yn siarad am ALS fel darparwr prentisiaeth, dywedodd Ysabela: “Fe wnaeth Gareth Davies fy asesydd fy nghefnogi bob cam o’r ffordd yn ystod y rhaglen. Unrhyw bryd roeddwn yn cael trafferth deall meini prawf yr uned neu os oedd gen i gwestiynau ynghylch casglu tystiolaeth, roedd yn gallu ateb ac egluro popeth. Llwyddais i gwblhau’r gwaith cwrs i safon dda gyda’i gymorth.
“Gwnaeth fy nghyflogwr, TCBC –SRS rhoi’r amser i fi gwblhau fy ngwaith cwrs yn ystod oriau gwaith. Fe wnaethant hefyd fy nghefnogi gydag unrhyw ymholiadau ynghylch casglu tystiolaeth yn ogystal â darparu cyfleoedd i gasglu tystiolaeth angenrheidiol yn y gweithle.”
Wrth siarad am ddysgu seiliedig ar waith a’r rhwystrau posibl i uwchsgilio darpar ddysgwyr, dywedodd Ysabela: “Rwy’n credu mai’r broblem yw nad oes gan rai sefydliadau gefnogaeth briodol ar waith i helpu pobl â datblygiad proffesiynol parhaus neu eu bod nhw ddim yn hysbysebu’r cyfleoedd hyn yn ddigon da i bobl gymryd rhan.”
Er gwaethaf yr heriau, mae Ysabela yn awyddus i argymell prentisiaethau i eraill, gan ychwanegu: “Mae’n anodd cydbwyso gweithio a chwblhau cwrs ar yr un pryd, ond mae’n werth ei wneud gan y byddwch yn derbyn cymhwyster ar y diwedd sy’n hynod ddefnyddiol ar gyfer eich twf personol.
“Fy nghyngor fyddai dewiswch eich cwrs yn ofalus. Gwnewch yn siŵr eich bod wedi cael trafodaeth gyda’ch cyflogwr i weld sut y gallant eich cefnogi, yn enwedig pan fydd angen i chi gasglu tystiolaeth yn y gweithle neu fynychu gwersi.”
More News Articles
« Gostyngiad brawychus mewn prentisiaethau’n dwysáu’r argyfwng ym maes iechyd a gofal cymdeithasol — Ysbrydoli’r Peirianwyr Yfory: Lansiad Menter Rhyngweithiol ‘Archwilio Peirianneg’ gan y PDSR ar draws De Orllewin Cymru »
