Mae gwrando ar lais cyflogwyr yn hanfodol ar gyfer dyfodol cymwysterau yng Nghymru
English | Cymraeg
Dean Seabrook a Leanne Hallett, Cymwysterau Cymru.
Beth sy’n atal rhai cyflogwyr rhag helpu i siapio addysg gweithlu Cymru yn y dyfodol? Cynhaliodd Leanne Hallett a Dean Seabrook o Cymwysterau Cymru weithdy arbennig i geisio cael yr atebion.
Mae gwrando ar farn a syniadau cyflogwyr yng Nghymru yn rhan bwysig o sicrhau bod ein system gymwysterau yn cynnig addysg sy’n cefnogi economi gadarn ac iach.
Dyna pam y cynhaliodd yr Uwch Reolwyr Cymwysterau Leanne Hallett a Dean Seabrook weithdy Cymwysterau Cymru i drafod dulliau effeithiol o ymgysylltu cyflogwyr â’r system gymwysterau yng nghynhadledd ddiweddar Ffederasiwn Hyfforddiant Cenedlaethol Cymru yng Nghaerdydd.
Amlinellodd y sesiwn, a fynychwyd gan nifer fawr, y rhan hanfodol mae lleisiau cyflogwyr yn ei chwarae wrth siapio’r system gymwysterau ac ymroddiad Cymwysterau Cymru i gasglu eu safbwyntiau.
Dywedodd Leanne: “Mae darparwyr dysgu a chyrff dyfarnu wedi sôn wrthyn ni am y gwerth mae cyflogwyr yn ei gynnig wrth ddatblygu cymwysterau a llwybrau. Roedden nhw’n pwysleisio bod eu cyfranogiad yn hanfodol wrth sicrhau bod cymwysterau’n addas i’r diben.”
Roedd y sesiwn hefyd yn edrych ar y prif resymau pam nad yw cyflogwyr bob amser yn gallu ymgysylltu mor llawn ag y bydden nhw’n hoffi â’r system gymwysterau.
Dywedodd Dean: “Awgrymodd y rhai a fynychodd mai ffactor sylweddol sy’n rhwystro cyflogwyr yw dod o hyd i’r amser a’r capasiti i gyfrannu at drafodaethau, a’r anhawster o gydbwyso hyn ochr yn ochr â llwythi gwaith, yn enwedig ar gyfer busnesau bach. Dywedodd y cyfranwyr wrthyn ni y byddai cefnogi dealltwriaeth cyflogwyr o’r system gymwysterau ymhellach yn ddefnyddiol, gan nad yw rhai cyflogwyr yn gwybod yr effeithiau y gallai eu cyfraniadau eu cael.”
Ychwanegodd Leanne: “Mae angen i fusnesau bach weld enillion uniongyrchol ar eu buddsoddiad o gymryd rhan mewn gwaith ymchwil, oherwydd heb gymhellion clir, dydy ymgysylltu ddim yn flaenoriaeth iddyn nhw.”
Esboniodd Leanne a Dean bedair ffordd y mae Cymwysterau Cymru yn eu defnyddio ar hyn o bryd i annog cyflogwyr i ymgysylltu â’r system gymwysterau.
- Dweud eich Dweud – ymgysylltu â phlatfform ar-lein y sefydliad i gael y wybodaeth ddiweddaraf ac i roi adborth.
- Grwpiau Cymwysterau Sector – annog cyflogwyr i chwarae rhan weithredol yn y grwpiau hyn.
- Cymwysterau yng Nghymru – defnyddio’r platfform hwn i lywio trafodaethau gyda darparwyr dysgu lleol.
- Cylchlythyr Cymwysterau Cymru – annog cyflogwyr i gael y wybodaeth ddiweddaraf drwy gofrestru ar gyfer y cylchlythyr misol (gall cyflogwyr gofrestru i dderbyn y cylchlythyr drwy hafan Cymwysterau Cymru).
Ychwanegodd Dean: “Fe wnaethon ni gloi’r sesiwn yn y gynhadledd trwy drafod ffyrdd o annog cyfraniad gan gyflogwyr a’i gwneud hi’n haws iddyn nhw gyfrannu.”
Awgrymodd rhanddeiliaid y byddai cefnogi cyflogwyr i ddeall gwahanol agweddau ar y system gymwysterau yn annog gwell cyfranogiad, yn enwedig:
y camau arferol wrth ddatblygu a chyflwyno cymwysterau newydd
ystod a dibenion cymwysterau galwedigaethol ar gyfer dysgwyr seiliedig ar waith yng Nghymru
sut mae cymwysterau’n cyd-fynd â setiau cydnabyddedig o safonau diwydiant neu swyddi galwedigaethol diffiniedig
drwy roi enghreifftiau o sut mae llais y cyflogwr wedi siapio meysydd o’r system gymwysterau bresennol
Gall cyflogwyr sy’n awyddus i ddysgu mwy anfon e-bost at dean.seabrook@cymwysterau.cymru neu leanne.hallett@cymwysterau.cymru
More News Articles
« Cyflwynwyd Prentis Itec Wobr Cyflawniad Academaidd gan Gyflogwr Gofal Iechyd — Cofrestru yn agor ar gyfer Dosbarth Meistr 2026 CGA: Llesiant mewn munudau nid misoedd »
