Hwb mawr i’r sector bragu yng Nghymru wrth iddo sicrhau cyllid ar gyfer hyfforddiant uwch i fragwyr
Mae diwydiant bragu Cymru ar fin cymryd cam sylweddol ymlaen o ran datblygu sgiliau technegol wrth i Glwstwr Diodydd Llywodraeth Cymru, gan weithio mewn partneriaeth â FDQ a MEDR Cymru, sicrhau cyllid i gyflwyno’r Diploma Bragu Lefel 4 newydd.
Bydd y cymhwyster uwch hwn yn cefnogi datblygiad bragwyr medrus iawn ledled Cymru ac yn cryfhau cystadleurwydd hirdymor y sector. Wrth groesawu’r cyhoeddiad, dywedodd Dirprwy Brif Weinidog ac Ysgrifennydd y Cabinet dros Newid Hinsawdd a Materion Gwledig Llywodraeth Cymru, Huw Irranca-Davies AS:
“Mae’r sector bragu yn rhan bwysig o dirwedd bwyd a diod Cymru, gan gyfrannu at economïau lleol, sgiliau ac arloesedd. Mae bragwyr Cymru yn parhau i ddangos uchelgais, arloesedd ac ymrwymiad i ansawdd, a bydd y cymhwyster newydd hwn yn rhoi’r offer sydd eu hangen arnynt i barhau i adeiladu ar y llwyddiant hwnnw.
“Drwy gefnogi cyflwyno’r Diploma Bragu Lefel 4, rydym yn buddsoddi’n uniongyrchol yn nyfodol y diwydiant, gan sicrhau bod bragwyr yn gallu cael mynediad at yr hyfforddiant technegol lefel uchel sydd ei angen i ffynnu mewn marchnad gynyddol gystadleuol. Bydd yr hyfforddiant hwn yn helpu i sicrhau twf hirdymor, gwella sgiliau ar draws y sector, a chryfhau ymhellach enw da Cymru am gynhyrchu cwrw eithriadol. Mae’n gam sylweddol ac i’w groesawu’n fawr ymlaen ar gyfer bragu yng Nghymru.”
Datblygwyd y Diploma Bragu Lefel 4 gan FDQ (Food & Drink Qualifications) Ltd, corff dyfarnu arbenigol ar gyfer y diwydiant bwyd a diod sy’n darparu cymwysterau achrededig, asesiadau prentisiaethau ac atebion hyfforddi i gefnogi sgiliau’r gweithlu, ac sydd yr unig gorff yn y DU â chymhwysedd penodol mewn prentisiaethau bragu. Dyma’r cymhwyster bragu uwch cyntaf o’i fath i’w ddarparu drwy gorff dyfarnu sy’n gweithredu yng Nghymru.
Mae’r cymhwyster wedi’i gynllunio i arfogi dysgwyr â dealltwriaeth ddyfnach o weithrediadau bragu, rheoli ansawdd, optimeiddio prosesau a gwneud penderfyniadau technegol. Mae’n cynrychioli cam ymlaen sylweddol i’r rhai sydd eisoes yn gweithio yn y sector bragu neu i ddysgwyr sy’n ceisio sgiliau proffesiynol uwch sy’n cyd-fynd â disgwyliadau cyflogwyr a safonau technegol y diwydiant.
Er mwyn sicrhau bod y cymhwyster yn adlewyrchu anghenion y sector bragu yng Nghymru, ffurfiwyd grŵp gwaith penodol, yn cynnwys pum bragdy o wahanol faint ac arddulliau cynhyrchu, gan gynnwys Bragdy Felinfoel, Bragdy Monty’s, Bragdy Magic Dragon, Bragdy Purple Moose a Wild Horse Brewing Co. Daeth pob un â’u safbwynt eu hunain, gan gynrychioli popeth o fragdai teuluol hanesyddol hir-sefydledig i gynhyrchwyr crefft modern sy’n tyfu’n gyflym.
Roedd Bragdy Monty’s, bragdy crefft arloesol yng nghanolbarth Cymru sy’n enwog am ei gwrw buddugol, yn un o’r cwmnïau a oedd yn rhan o’r grŵp gwaith. Dywedodd y cyfarwyddwr Pamela Honeyman:
“Rydym yn falch o fod wedi cyfrannu at ddatblygu’r diploma hwn. Mae mynediad at hyfforddiant technegol uwch yn hanfodol i ysgogi ansawdd, effeithlonrwydd ac arloesedd, a bydd y Diploma Bragu Lefel 4 yn rhoi’r cyfle i’n tîm ddatblygu sgiliau newydd a symud ymlaen o fewn y diwydiant. Mae’n ddatblygiad hynod gadarnhaol i fragu yng Nghymru.”
Roedd Wild Horse Brewing Co, sydd wedi’i leoli yn Llandudno ac yn adnabyddus am ei gwrw modern sy’n llawn blas, hefyd yn rhan o’r grŵp gwaith. Ychwanegodd y Cyfarwyddwr Rheoli, Dave Faragher:
“Mae bod yn rhan o’r grŵp gwaith wedi sicrhau bod y diploma yn adlewyrchu realiti bragu modern. Mae’r cyfle i fragwyr Cymru elwa ar hyfforddiant ymarferol a thechnegol sy’n cael ei arwain gan y diwydiant yn hynod werthfawr. Rydym yn falch o fod wedi helpu i’w lunio ac yn edrych ymlaen at weld yr effaith ar draws y sector.”
Drwy alluogi bragwyr i ennill cymhwyster uwch cydnabyddedig, mae’r Diploma Bragu Lefel 4 yn helpu i fynd i’r afael â bylchau sgiliau ac yn cefnogi cyflogwyr sy’n dymuno datblygu talent o fewn eu sefydliadau. Mae’r diploma bellach ar gael, a gall bragwyr yng Nghymru wneud cais ar unwaith. Mae’r rhaglen yn agored i bob bragdy yng Nghymru, a bydd ymgeiswyr yn cael eu gwahodd i wneud cais am le ar y diploma yn ogystal â chymorth cyllid.
Wrth sôn am y cydweithio, dywedodd Matthew Bell, Pennaeth Ymgysylltu yn FDQ:
“Mae lansio’r Diploma Bragu Lefel 4 yn gam mawr ymlaen o ran datblygu sgiliau yn niwydiant bragu Cymru. Mae wedi’i gynllunio gan y diwydiant i arfogi dysgwyr â’r wybodaeth dechnegol lefel uwch a’r cymhwysedd ymarferol sydd ei angen ar gyfer rolau fel prif fragwr ac arweinydd cynhyrchu, gan integreiddio gwyddoniaeth fragu gynhwysfawr, rheoli gweithrediadau ac egwyddorion cynaliadwyedd mewn fframwaith rheoledig sy’n canolbwyntio ar y gweithle.
“Mae’r diploma hwn yn cefnogi prentisiaid ar gam hollbwysig yn eu gyrfa, gan feithrin arbenigedd diwydiant a dilyniant proffesiynol hirdymor.”
Am ragor o wybodaeth am y Diploma Bragu Lefel 4, cysylltwch â Matthew Bell yn FDQ – matthew.bell@fdq.org.uk
More News Articles
« Cwmni Hyfforddiant Cambrian ar frig tablau llwyddiant prentisiaethau cenedlaethol —
