Herio ymgeiswyr yn Etholiad y Senedd i ddyblu’r buddsoddiad mewn prentisiaethau
Mae sefydliad sy’n cynrychioli darparwyr hyfforddiant ledled Cymru yn galw ar bob plaid wleidyddol a’r holl ymgeiswyr yn Etholiad y Senedd 2026 i ymrwymo i ddyblu’r buddsoddiad mewn prentisiaethau er mwyn cefnogi 200,000 o brentisiaid dros dymor y Senedd nesaf.
Heddiw (Mehefin 24), lansiodd Ffederasiwn Hyfforddiant Cenedlaethol Cymru (NTFW) y ‘ Maniffesto ar gyfer Prentisiaethau: Adeiladu Economi Sgiliau’n Gyntaf i Gymru’ sydd â’r nod o “adeiladu Cymru sy’n ffynnu ar sgiliau, cyfleoedd ac uchelgais i bawb.”
Yn ôl y Ganolfan Economeg ac Ymchwil Busnes (CEBR), gallai dyblu’r buddsoddiad mewn prentisiaethau dros dymor y Senedd nesaf ychwanegu £3.4 biliwn at enillion gydol oes pobl yng Nghymru dros y 30 mlynedd nesaf.
“Mae prentisiaethau’n fwy na llwybr at gyflogaeth; maent yn asgwrn cefn economi lewyrchus yng Nghymru, yn arfogi pobl o bob cefndir â sgiliau ymarferol sy’n diwallu anghenion ein diwydiannau,” dywed Maniffesto’r NTFW.
“Mae buddsoddi mewn prentisiaethau’n fuddsoddiad mewn pobl ac yn nyfodol Cymru. Gyda chyllid teg, mynediad cynhwysol a phartneriaethau cryf, gall prentisiaethau helpu i bweru cenedl fwy cyfartal, medrus a chydnerth.
“Mae’r NTFW yn annog pob plaid wleidyddol a’r holl ymgeiswyr yn Etholiad y Senedd i ymrwymo i’r weledigaeth hon. Gadwch i ni adeiladu Cymru sy’n ffynnu ar sgiliau, cyfleoedd ac uchelgais i bawb.”
Mae ‘cydweithio’ yn air allweddol trwy’r Maniffesto cyfan ac mae’r NTFW yn awyddus i weithio mewn partneriaeth â Llywodraeth Cymru, Medr, darparwyr hyfforddiant, cyflogwyr, dysgwyr, Ffederasiwn y Busnesau Bach (FSB), Cydffederasiwn Diwydiant Prydain (CBI) a’r Coleg Cymraeg Cenedlaethol..
“Trwy gydweithio’n agos â Medr, gallwn sicrhau bod rhaglenni prentisiaethau’n ymatebol, yn flaengar ac yn diwallu anghenion sy’n datblygu yn y diwydiant,” dywed y Maniffesto.
“Trwy gydweithredu, gallwn lunio rhaglenni prentisiaethau sy’n mynd i’r afael yn uniongyrchol â bylchau sgiliau, yn hybu cynhyrchiant ac yn cefnogi amrywio economaidd.”
Mae’r NTFW yn ymrwymo i ddarparu cyfle cyfartal i ennill cymwysterau a gyflenwir trwy gyfrwng y Gymraeg neu’n ddwyieithog ac mae’n galw ar Lywodraeth nesaf Cymru i flaenoriaethu gwasanaethau cymorth i brentisiaid ym maes iechyd meddwl a llesiant.
Mae’r Maniffesto’n galw ar Lywodraeth nesaf Cymru i adfer yr arian a dorrwyd o’r gylldeb brentisiaethau y llynedd ac i gyflwyno model cyllido hirdymor, cynaliadwy sy’n gwneud prentisiaethau’n gyfartal â mathau eraill o addysg ôl-16.
Mae’n dweud bod rhaid i brentisiaethau fod yn greiddiol i bolisi’r llywodraeth ac mae’n galw am strategaeth sgiliau galwedigaethol, wedi’i datblygu mewn partneriaeth â darparwyr, er mwyn penderfynu beth y mae angen ei wneud er mwyn manteisio i’r eithaf ar gyfleoedd.
Yn ogystal, mae’r Maniffesto’n galw am:
- system sgiliau sy’n adlewyrchu dyheadau economi Cymru.
- cyfle i bobl o bob oed a chefndir i ailhyfforddi neu uwchsgilio trwy brentisiaethau, gan hybu symudedd cymdeithasol a thwf cynhwysol.
- mwy o gyllid ar gyfer prentisiaethau mewn sectorau sy’n tyfu, fel ynni gwyrdd, arloesi digidol a gofal iechyd, er mwyn diogelu gweithlu Cymru ar gyfer y dyfodol.
- cyfleoedd i ddilyn prentisiaethau ym mhob rhan o Gymru, er mwyn cefnogi economïau lleol, lleihau anghydraddoldebau a grymuso cymunedau.
Dywedodd Lisa Mytton, cyfarwyddwr strategol yr NTFW: “Rydym wedi lansio’r maniffesto hwn sy’n nodi’r hyn rydym yn disgwyl i Lywodraeth newydd Cymru ei flaenoriaethu yn eu polisïau a’u strategaeth sgiliau er mwyn hybu economi Cymru.
“Ein mandad i’r llywodraeth nesaf yw sicrhau bod mwy o fuddsoddiad ar gael ar gyfer prentisiaethau. Rydym yn ceisio’r ymrwymiad hwnnw gan bob un o’r ymgeiswyr yn etholiad nesaf y Senedd.”
Ac meddai John Nash, cadeirydd yr NTFW: “Mae hwn yn ddigwyddiad arwyddocaol. Rydym wedi creu Maniffesto uchelgeisiol ar gyfer Prentisiaethau a dylai fod yn hanfodol i bob un o’r ymgeiswyr yn Etholiad y Senedd ei ddarllen.
“Rydym yn gofyn i bob plaid wleidyddol ymrwymo i roi prentisiaethau wrth galon polisïau Llywodraeth Cymru yn y dyfodol er mwyn adeiladu economi lewyrchus a chydnerth ac iddi weithlu eithriadol o fedrus.”
Y siaradwyr yn y cyfarfod lansio a gynhaliwyd yng Ngwesty Dewi Sant, Bae Caerdydd, oedd cadeirydd yr NTFW John Nash, y cyfarwyddwr strategol Lisa Mytton, Pennaeth Cymru FSB Ben Cottam, Ioan Matthews Prif Weithredwr y Coleg Cymraeg Cenedlaethol ac un o gyfarwyddwyr Cavendish Cymru Nerys Evans.
Maniffesto NTFW – Lawrlwythwch yma.
More News Articles
« Yr NTFW yn paratoi ymateb i ymgynghoriad Medr ar gofrestr addysg drydyddol — Mae hyfforddwyr prentisiaethau yn dod yn ddysgwyr i dyfu eu sgiliau a’u gwybodaeth »
