Yr NTFW yn paratoi ymateb i ymgynghoriad Medr ar gofrestr addysg drydyddol
Lisa Mytton, NTFW Cyfarwyddwr Strategol.
Gair gan ein Cyfarwyddwr Strategol
Mae’r NTFW wrthi’n llunio ymateb i ymgynghoriad pwysig a lansiwyd gan Medr ar ddatblygu system reoleiddio newydd ar gyfer addysg drydyddol a honno’n seiliedig ar gofrestr.
Ochr yn ochr â’r ymgynghoriad – a gynhelir o dan ddarpariaethau Deddf Addysg Drydyddol ac Ymchwil (Cymru) 2022 – mae Medr yn gweithio ar delerau ac amodau cyllido a fydd yn berthnasol ar draws y sector trydyddol ehangach, yn ogystal â fframwaith ansawdd a gwella’n barhaus.
Mae’r ymgynghoriad cam-cyntaf hwn yn ceisio barn pobl ar yr eitemau hyn a gynigir gan Medr:
- Dull Rheoleiddio, yn amlinellu ei rôl fel rheoleiddiwr cymesur a seiliedig-ar-risg a’r fframwaith ar gyfer ymyrryd.
- Fframwaith Rheoleiddio, yn cynnwys Amodau Cofrestru ac Amodau Cyllid drafft, gofynion cydymffurfio, trefniadau monitro a phrosesau adrodd.
- Fframwaith Ansawdd, sy’n sail i’r gofynion a’r safonau monitro ar gyfer sicrwydd ansawdd.
Dywedodd Lisa Mytton, cyfarwyddwr strategol yr NTFW, fod yr ymgynghoriad yn un o blith llawer o ymrwymiadau sydd gan y Ffederasiwn mewn cyfnod prysur.
Mae Medr wedi dechrau cynnal grwpiau llywio ar nifer o bynciau pwysig – sefydlwyd Grŵp Undebau Llafur newydd i gryfhau’r ymwneud ag undebau llafur addysg.
Y nod yw gwella’r broses o rannu gwybodaeth, sicrhau cyfranogiad cynnar mewn penderfyniadau polisi a datblygu dealltwriaeth ddyfnach o’r ffordd y mae ein gwaith yn effeithio ar weithlu’r sector trydyddol.
Er mwyn cefnogi cynllun cyflawni’r Iaith Gymraeg, mae Medr wedi sefydlu gweithgor i gynghori ar faterion allweddol fel mecanweithiau cyflawni, egwyddorion cychwynnol a threfniadau ymgynghori. Bydd Elen Rees o Gwmni Hyfforddiant Cambrian yn cynrychioli’r NTFW yn y grŵp hwn.
Mae Grŵp Anghenion Dysgu Ychwanegol (ADY) Medr yn dal i gyfarfod yn rheolaidd, gan ddwyn ynghyd gynrychiolwyr o bob un o’r 10 deiliad contract a gomisiynwyd.
Bu’r trafodaethau’n canolbwyntio ar y ddarpariaeth ADY a’r gefnogaeth sydd ar gael, ynghyd ag ymdrechion i fynd i’r afael â rhwystrau i gyllid Cymorth Dysgu Ychwanegol (CDY). Mae’r grŵp hwn yn ystyried ffyrdd o ddiweddaru’r canllawiau a’r meini prawf er mwyn creu model ariannu mwy hygyrch i ddarparwyr.
Mae Medr wedi gwahodd Estyn a’r Asiantaeth Sicrhau Ansawdd i gydweithio ar hunanwerthuso a chynllunio gwella ansawdd yn y sector trydyddol, gydag Angela Maguire-Lewis, aelod o fwrdd yr NTFW, yn cymryd rhan yn y gwaith pwysig hwn.
Yn ogystal, bu’r NTFW mewn cyfarfodydd rheolaidd i baratoi ar gyfer Rowndiau Terfynol Cenedlaethol WorldSkills UK sy’n dod i Gymru ar Dachwedd 25-28.
Yn olaf, gwnaed llawer iawn o waith ar Faniffesto’r NTFW ar gyfer Prentisiaethau i baratoi ar gyfer etholiad y Senedd 2026. Bydd yn cael ei lansio ar 24 Mehefin yng Ngwesty Dewi Sant, Caerdydd.
More News Articles
« Gŵyl Sgiliau 2025: DPP Ymarferol i Rymuso Addysgu sy’n Seiliedig ar Sgiliau — Herio ymgeiswyr yn Etholiad y Senedd i ddyblu’r buddsoddiad mewn prentisiaethau »
