Rhaglen Sgiliau a Thalentau yn dyfarnu cyllid i Fenter Addysgol Arloesol
Yn 2020, arweiniwyd y prosiect peilot cyntaf i gael ei ariannu gan Raglen Sgiliau a Thalentau Bargen Ddinesig Bae Abertawe gan ddwy ysgol cyfrwng Cymraeg, Ysgol Gyfun Gymraeg Bro Myrddin ac Ysgol Gyfun Gymraeg Maes y Gwendraeth, mewn cydweithrediad â Phrifysgol Cymru y Drindod Dewi Sant. Nod y prosiect oedd mynd i’r afael â bwlch sgiliau yn y rhanbarth trwy gynnig cyfle i ddisgyblion ennill cymwysterau Lefel 2 a Lefel 3 mewn Peirianneg ac Astudiaethau Digidol trwy gyfrwng y Gymraeg. Hon oedd y rhaglen gyntaf o’i math. Ers iddi gael ei chymeradwyo, mae’r rhaglen wedi cael llwyddiant wrth gofrestru cannoedd o ddisgyblion i ddilyn y cyrsiau Lefel 2 a Lefel 3 ac mae llawer wedi gadael yr ysgol â’r cymhwyster a symud ymlaen i goleg, prifysgol neu brentisiaeth.
Cynlluniwyd y rhaglen i roi dealltwriaeth gynhwysfawr i’r disgyblion o’r cyfleoedd sydd ar gael yn y sectorau peirianneg a TG. Trwy gydweithio’n agos â’r Brifysgol, dysgodd y disgyblion sgiliau ymarferol gan ddefnyddio’r offer diweddaraf ac maent wedi cael budd o waith ymchwil a wnaed gan y Brifysgol. Mae’r profiad ymarferol hwn yn yr ysgolion yn golygu eu bod yn symud yn ddiffwdan i addysg uwch.
Mae’r rhaglen Sgiliau a Thalentau, a reolir gan y Bartneriaeth Dysgu a Sgiliau Ranbarthol, yn cefnogi prosiectau peilot sy’n hybu datblygiad sgiliau ac yn ymateb i anghenion economaidd lleol. Bu cynnydd sylweddol yn nifer y disgyblion sy’n cofrestru ar gyfer y cymwysterau hyn yn y ddwy ysgol. Mae tua 40% o’r disgyblion sy’n cwblhau cyrsiau Lefel 2 yn symud ymlaen i Lefel 3, gan ddilyn llwybr addysgol clir a pharhau i ddangos diddordeb yn y meysydd hyn. Ers dechrau’r prosiect peilot, mae 843 o ddisgyblion wedi cofrestru ar gyfer cymwysterau Lefel 2 a Lefel 3 mewn Peirianneg ac Astudiaethau Digidol, gan ddangos llwyddiant y cyrsiau a’r galw mawr sydd amdanynt.
Dywedodd Dr Llinos Jones, Pennaeth Ysgol Gyfun Gymraeg Bro Myrddin: “Mae’r Rhaglen Sgiliau a Thalentau wedi sbarduno newid sylweddol, ac mae ein menter addysgol arloesol wedi’n galluogi i gyrraedd uchelfannau newydd yn ein hysgolion. Yn ogystal â galluogi’r dysgwyr i elwa ar fwy o adnoddau dysgu, mae’r cyllid hwn wedi eu grymuso â sgiliau ar gyfer y dyfodol, gan feithrin twf a chyfleoedd hirdymor yn y rhanbarth.”
“Mae’r prosiect hwn wedi ychwanegu at gyfleoedd llawer iawn o bobl ifanc gan eu galluogi i ddysgu sgiliau y bydd eu hangen ar gyfer swyddi yn y dyfodol, yn y rhanbarth a’r tu hwnt. Rydym yn llongyfarch yr ysgolion ar eu gwaith gwych yn enwedig wrth gyflwyno’r sgiliau y mae angen mawr amdanynt yn y rhanbarth. Gobeithio y caiff hyd yn oed ragor o fyfyrwyr eu hysbrydoli i ddilyn llwybrau Digidol a Pheirianneg.“ Jane Lewis, Rheolwr y Bartneriaeth Sgiliau Ranbarthol.
Mae’r Rhaglen Sgiliau a Thalentau yn un o naw prosiect sydd gan y Fargen Ddinesig. Rheolir y rhaglen gan y Bartneriaeth Dysgu a Sgiliau Ranbarthol. Mae’r rhaglen £30 miliwn yn helpu i ddarparu’r sgiliau y bydd eu hangen yn y dyfodol mewn 5 sector, sef adeiladu, ynni, digidol, gweithgynhyrchu ac iechyd. Mae’r rhaglen yn cefnogi prosiectau peilot i ddysgu sgiliau neu uwchsgilio mewn meysydd allweddol lle mae prinder neu nad yw’r cymwysterau gennym. Hyd yma mae’r rhaglen wedi cefnogi 23 o brosiectau peilot ac wedi datblygu pedair rhaglen brentisiaethau newydd ac mae rhagor i ddod. Nod y rhaglen erbyn 2030 yw sicrhau 14,000 o unigolion â sgiliau uwch a chymhwyster Lefel 2 neu uwch; 3,000 o brentisiaethau; 2,200 o unigolion â mwy o sgiliau; creu 20 cwrs newydd a dwy Ganolfan Ragoriaeth.
Partneriaeth Dysgu a Sgiliau Rhanbarthol – De-orllewin Cymru
More News Articles
« Herio Llywodraeth Cymru i fuddsoddi fel Lloegr mewn prentisiaethau — Ymunwch ag ymgyrch Wythnos Addysg Oedolion #PaidStopioDysgu »
