Herio Llywodraeth Cymru i fuddsoddi fel Lloegr mewn prentisiaethau
Lisa Mytton, NTFW Cyfarwyddwr Strategol NTFW
Mae corff sy’n cynrychioli darparwyr hyfforddiant ledled Cymru yn herio Llywodraeth Cymru i ddilyn arweiniad Llywodraeth y Deyrnas Unedig a blaenoriaethu buddsoddi mewn sgiliau a phrentisiaethau.
Cyhoeddodd y Canghellor Rachel Reeves yn adolygiad gwariant Llywodraeth y DU y rhoddir £1.2 biliwn y flwyddyn i gefnogi hyfforddiant a phrentisiaethau mwy na miliwn o bobl ifanc yn Lloegr.
Bwriad Llywodraeth y DU yw dyrannu £23 biliwn i Gymru, a hoffai Ffederasiwn Hyfforddiant Cenedlaethol Cymru (NTFW) weld Llywodraeth Cymru’n buddsoddi mwy o arian er mwyn ehangu cyfleoedd am brentisiaethau mewn ffordd sy’n cyfateb i ymrwymiad Lloegr i ddatblygu’r gweithlu.
Mewn datganiad ystadegol yn ddiweddar gan Medr, sy’n rheoleiddio ac yn cyllido addysg drydyddol ac ymchwil yng Nghymru, datgelwyd bod 1,880 yn llai o ddysgwyr wedi dechrau prentisiaethau yng Nghymru rhwng mis Awst diwethaf a mis Ionawr.
Mae’r NTFW wedi mynegi pryder wrth Lywodraeth Cymru yn gyson y gallai peidio â gwneud iawn am yr arian Ewropeaidd a gollwyd ar gyfer prentisiaethau, yn dilyn Brexit, amharu’n sylweddol ar ddysgwyr a busnesau ledled Cymru.
Mae’r gostyngiad o 15% yn nifer y prentisiaid newydd wedi taro rhai sectorau’n galed iawn. Yn eu plith mae’r sector adeiladu, sy’n allweddol i brosiectau seilwaith y dyfodol, ac a welodd ostyngiad o 26%. Bu gostyngiad o 10.5% yn nifer y rhai a ddechreuodd brentisiaethau mewn Iechyd a Gofal Cymdeithasol, sy’n hanfodol er mwyn sicrhau bod y system iechyd gyfan yn gweithredu’n effeithiol.
Er gwaetha’r toriadau ariannol, mae rhaglen brentisiaethau Cymru yn un o’r rhai mwyaf llwyddiannus yn y DU, gyda chyfradd gwblhau gyfartalog o 74%, sy’n well na Lloegr (61%) a Gogledd Iwerddon (62%).
Mae prentisiaethau’n chwarae rhan hanfodol mewn tri maes allweddol:
- Ffyniant Economaidd – Yn ôl y Ganolfan Economeg ac Ymchwil Busnes (CEBR), gallai dyblu’r buddsoddiad mewn prentisiaethau dros dymor y Senedd nesaf ychwanegu £3.4 biliwn at enillion gydol-oes pobl yng Nghymru dros y 30 mlynedd nesaf.
- Cynhwysiant Cymdeithasol – Mae’r rhaglen brentisiaethau yn arbennig o fuddiol i unigolion o gefndiroedd difreintiedig, gan gynnig llwybrau i swyddi ystyrlon.
- Gofal Iechyd – Mae prentisiaethau’n hanfodol er mwyn i’r GIG yng Nghymru weithredu’n effeithlon, gan sicrhau cyflenwad da o weithwyr proffesiynol medrus.
Daw galwad yr NTFW ar ôl cyfarfod cynhyrchiol ddydd Iau diwethaf rhwng aelodau’r bwrdd a’r Gweinidog Diwylliant, Sgiliau a Phartneriaeth Gymdeithasol yn Llywodraeth Cymru, Jack Sargent.
Dywedodd yr NTFW fod y gweinidog wedi ymateb yn gadarnhaol i’w pryderon ac wedi cydnabod manteision economaidd ehangach rhaglenni prentisiaethau.
O ystyried buddsoddiad enfawr Lloegr mewn prentisiaethau a hyfforddiant, dywedodd Lisa Mytton, cyfarwyddwr strategol yr NTFW: “Gallai Llywodraeth Cymru wireddu blaenoriaethau hanfodol o ran yr economi, iechyd ac addysg trwy fuddsoddi mwy mewn prentisiaethau a gwneud iawn am yr arian Ewropeaidd a gollwyd.
“Wrth fuddsoddi mwy, gellir creu llwybrau i bobl o bob cefndir, boed ar ddechrau eu gyrfaoedd neu’n ailhyfforddi ar gyfer cyfleoedd newydd, i ffynnu mewn diwydiannau sy’n hanfodol i ffyniant hirdymor Cymru.
“Ar hyn o bryd, nid yw cyflogwyr mawr sy’n gweithio ar y naill ochr a’r llall i’r ffin yn deall pam fod cyllid a chyfleoedd i brentisiaid wedi cael eu torri yng Nghymru, a’r rhaglen yn dal i dyfu’n gyflym yn Lloegr.
“Gyda chefnogaeth gref y Llywodraeth, gallai prentisiaethau ddal ati i roi hwb ymlaen i Gymru, gan greu swyddi newydd, cryfhau diwydiannau a sicrhau dyfodol llewyrchus i’r genhedlaeth nesaf.”
More News Articles
« Gwobrau yn Cydnabod Sêr Prentisiaethau Cwmni Hyfforddi Blaenllaw yng Nghymru — Rhaglen Sgiliau a Thalentau yn dyfarnu cyllid i Fenter Addysgol Arloesol »
