Tîm y DU Cymru yn cyflwyno perfformiad sydd wedi ennill medal yn y ‘Gemau Olympaidd sgiliau’
Ruben Duggan – WorldSkills Lyon 2024 – Arian mewn Plymwaith a Gwresogi
Gall Cymru ymfalchïo yn y chwe pherson ifanc ymroddedig a gynrychiolodd eu gwlad yn 47fed Cystadleuaeth WorldSkills yn Lyon yr wythnos diwethaf gan ddod â medal arian ac anrhydedd Gorau yn y Genedl adref.
Ruben Duggan o Fanmoel yn y Coed Duon enillodd Arian mewn Plymwaith a Gwresogi. Wrth ei fodd gyda’i gyflawniad, dywedodd Ruben: “Mae’n ddiweddglo eithaf i daith wych, o fy ngholeg bach yn y cymoedd i ennill medal arian yn rowndiau terfynol y byd. Does dim byd yn cymharu â hyn.”
Ruby Pile, sy’n gweithio yng Ngwesty a Sba Lucknam Park ac a fynychodd Goleg Caerdydd a’r Fro ‘Gorau yn y Genedl’ ar gyfer y DU mewn Gwasanaeth Bwyty. Mynegodd Ruby ei balchder, gan ddweud: “Mae derbyn y wobr hon yn anrhydedd wych. Rydw i mor falch ohonof fy hun, yn enwedig ar ôl yr holl waith caled rydw i wedi’i wneud dros y 2 flynedd ddiwethaf.”
Fel rhan o 31 y Dîm DU, roedd yr unigolion dawnus hyn yn wynebu cystadleuaeth galed gan dros 1,500 o gyfranogwyr ar draws 69 o wledydd. Mae cyrraedd y gystadleuaeth yn dyst i sgil ac ymroddiad anhygoel y bobl ifanc hyn, y mae eu gwaith caled a’u penderfyniad wedi dod â balchder i Gymru ar y llwyfan byd-eang.
Wedi’u dethol, eu mentora a’u hyfforddi gan WorldSkills DU, a’u cefnogi gan Ysbrydoli Rhagoriaeth Sgiliau yng Nghymru, maent wedi cael eu cydnabod ymhlith y bobl ifanc mwyaf medrus yn y byd gan arbenigwyr blaenllaw yn y diwydiant byd-eang yn dilyn eu perfformiad ennill medalau yn y digwyddiad y cyfeirir ato’n aml fel y ‘Gemau Olympaidd sgiliau’.
Mae WorldSkills DU, sy’n bartneriaeth pedair gwlad rhwng addysg, diwydiant a llywodraethau’r DU, yn defnyddio’r mewnwelediad y mae’n ei gael o gymryd rhan yng Nghystadleuaeth ryngwladol WorldSkills i ymgorffori safonau hyfforddi o’r radd flaenaf ledled y DU. Pearson, cwmni dysgu gydol oes y byd yw partner swyddogol Tîm y DU ar gyfer WorldSkills Lyon 2024.
Mae’r DU wedi bod yn cymryd rhan yng Nghystadleuaeth WorldSkills ers 1953 ac mae’r digwyddiad yn cael ei ddefnyddio gan lywodraethau ledled y byd, economegwyr ac arweinwyr busnes byd-eang fel prawf litmws o sgiliau pedigri a photensial twf economaidd.
Dywedodd y Gweinidog Sgiliau Jack Sargeant:
“Nid yw bod yn rhan o Dîm DU yn ymwneud â balchder cenedlaethol yn unig – mae’n ymwneud â rhoi’r sgiliau i’n pobl ifanc a fydd yn llywio dyfodol ein cenedl. Bydd yr arbenigedd y maent yn ei ddatblygu heddiw yn hybu economi, arloesedd a chymdeithas yfory.
“Rydym yn hynod falch o’r chwe chystadleuydd o Gymru a gynrychiolodd Gymru fel rhan o Dîm DU. Mae eu llwyddiant yn adlewyrchiad nid yn unig o’u hymroddiad eu hunain ond hefyd o gefnogaeth amhrisiadwy’r tîm o arbenigwyr a fu’n eu mentora a’u harwain ar hyd y daith.
“Dylid dathlu cystadlaethau fel hyn gyda’r un brwdfrydedd â digwyddiadau athletaidd proffil uchel, gan eu bod yn codi safonau, yn ysbrydoli rhagoriaeth, ac yn arddangos y dalent a fydd yn gyrru Cymru a’r DU ymlaen fel arweinwyr byd-eang.”
Bu dros 1500 o bobl ifanc o 69 gwlad yn cystadlu dros bedwar diwrnod o gystadleuaeth galed mewn 62 o wahanol sgiliau yn WorldSkills Lyon. Gwyliwyd y digwyddiad gan dros 250,000 o wylwyr.
Dywedodd Ben Blackledge, Prif Weithredwr, WorldSkills DU:
“Mae hwn yn ganlyniad gwych i’r tîm a’r DU cyfan. Mae datblygu sgiliau o ansawdd uchel yn hanfodol i dyfu’r economi, ac mae perfformiad tîm DU, sydd wedi ennill medalau o flaen cynulleidfa fyd-eang, yn anfon neges gref bod y DU yn lle o safon fyd-eang i fuddsoddi, datblygu talent a chreu swyddi.”
Cynhaliwyd WorldSkills Lyon 2024 rhwng 10 a 15 Medi. Bydd Cystadleuaeth WorldSkills nesaf yn cael ei chynnal yn 2026 yn Shanghai, Tsieina.
Ysbrydoli Rhagoriaeth Sgiliau yng Nghymru
More News Articles
« Cannoedd o gyrsiau am ddim ar gael ledled Cymru yn ystod Wythnos Addysg Oedolion — Bydd cymwysterau Sgiliau Hanfodol Cymru yn cael eu diwygio yn dilyn adolygiad manwl »
