Gweithiwr Bwrdd Iechyd yn ennill sgiliau TG hanfodol gyda chymorth prentisiaeth
Camgymeriad cyffredin ynglŷn â dysgu seiliedig ar waith a phrentisiaethau yw mai dim ond pobl sy’n dechrau mewn rôl sy’n gallu ymgymryd â nhw. Myth arall yw mai dim ond mewn ambell sector gwaith llaw y mae prentisiaethau ar gael. Mae’r rhain yn bell o fod yn wir.
David Chaffey, Gweithredwr Switsfwrdd ym Mwrdd Iechyd Prifysgol Aneurin Bevan.
Mae prentisiaethau’n ffordd wych o uwchsgilio aelodau staff presennol ar bob lefel mewn busnes. Mae pynciau’n amrywio o gyfryngau cymdeithasol a chyllid i wasanaeth cwsmer a rheolaeth, sy’n golygu y gallwch ddarganfod pwnc sydd o ddiddordeb ac sydd o fudd i chi pa bynnag ddiwydiant rydych yn gweithio ynddi.
Enghraifft berffaith o natur amrywiol dysgu seiliedig ar waith yw taith brentisiaeth David Chaffey. Mae David yn Weithredwr Switsfwrdd ym Mwrdd Iechyd Prifysgol Aneurin Bevan, ef yw’r pwynt cyswllt cyntaf ar gyfer gwasanaeth telathrebu’r bwrdd.
Mae ei rôl yn cynnwys darparu gwasanaeth cyflym, cyfeillgar ac effeithlon i gydweithwyr, aelodau’r cyhoedd a sefydliadau partner eraill. Yn ddysgwr brwd, ymgymerodd David â chymhwyster Defnyddwyr TG Lefel 3 er mwyn hybu ei hyfedredd gyda’r offer yr oedd yn eu defnyddio o ddydd i ddydd; er ni ddaeth hyn heb ei heriau.
Mae gan David nam ar ei olwg ac mae’n defnyddio darllenydd sgrin JAWS i’w helpu i gwblhau tasgau.
“Roeddwn i’n awyddus i gael gwell dealltwriaeth o Office 365 a sut y gallwn ei ddefnyddio i wneud y mwyaf ohono, ochr yn ochr â’m darllenydd sgrin,” esboniodd David.
Cyn pen dim roedd yn gallu trosglwyddo’r sgiliau a ddatblygwyd o fewn y cymhwyster i’w rôl bob dydd.
Dywedodd: “Rhoddodd y cwrs yr hyder, y sgiliau a’r wybodaeth i mi allu defnyddio Office 365 mewn ffordd hollol newydd.
“Cyn hynny roeddwn i’n defnyddio Outlook a Word a dyna’r cyfan. Ers ymgymryd â’r cwrs, rwy’n hapus i ddefnyddio holl raglenni Office sydd nid yn unig wedi bod o fudd i mi yn fy rôl bresennol ond sydd wedi fy ngalluogi i wneud y mwyaf ohono yn fy rôl secondiad fel Swyddog Cynhwysiant Anabledd.”
Un o fanteision prentisiaeth yw bod y cwrs yn hyblyg ac y gellir ei gwblhau ochr yn ochr â’ch rôl, gan ategu eich gwaith.
“Roedd y math hwn o ddysgu yn fy siwtio i gan fy mod yn gweithio, ond yn dal i ddysgu a datblygu fy sgiliau a’m gwybodaeth, ei gymhwyso i’m hamgylchedd gwaith ac ennill profiad bywyd go iawn,” meddai David.
Os oes gan ddysgwyr anghenion ychwanegol y mae’n rhaid eu hystyried wrth weithio tuag at eu cymhwyster, gall ACT wneud newidiadau neu addasiadau. Yn achos David, roedd ganddo ddarllenydd ac ysgrifennwr i’w helpu i gwblhau’r gwaith cwrs.
“Rwy’ wedi derbyn cefnogaeth wych drwy gydol y cwrs,” meddai David. “fe wnâi gyfaddef fy mod i bron heb orffen ond yn ffodus, gyda’r gefnogaeth a gefais gan y tiwtoriaid, y darllenydd a’r ysgrifennwr, rwy’ bellach wedi cyflawni’r nod ac mae’n rhaid i mi gyfaddef mai dyma’r teimlad gorau.”
Efallai y bydd angen i ddysgwyr sy’n dymuno ymgymryd â phrentisiaeth seiliedig ar waith gwblhau Sgiliau Hanfodol – set o gymwysterau i sicrhau bod gan y dysgwyr sylfaen gadarn mewn mathemateg, cyfathrebu a llythrennedd digidol. Nid ei gwrs TG yn unig a gwblhaodd David, ond fe gyflawnodd hefyd ei Sgiliau Hanfodol gan roi hwb i’w hyder a’i sgiliau cyflogadwyedd.
Dywedodd tiwtor David yn ACT, Caitlin Edmonds: “Mae David wedi rhagori yn ei gyrsiau, yn enwedig yn y tasgau siarad a gwrando. Rhywbeth rwy’n cofio oedd ei hyder yn ei gyflwyniad yn egluro sut mae wedi bod yn helpu i ailwampio a hyfforddi eraill yn y bwrdd iechyd i sicrhau bod gan bob person â nam ar eu golwg y pethau bychain sydd eu hangen arnynt wrth gyrraedd yr ysbyty.
“Roedd gan David agwedd dawel a hyderus tuag at ddysgu ac ni adawodd i’w anabledd ei rhwystro. Bob tro y byddai’n cwblhau cymhwyster, byddai’n myfyrio ar ei lwyddiant, faint yr oedd wedi’i ddysgu a’i oresgyn i gyflawni ei nod.”
More News Articles
« Dros 60 o gyflogwyr yn lleisio pryder ynghylch toriadau posibl i brentisiaethau — Dros 60 o gyflogwyr yn lleisio pryder ynghylch toriadau posibl i brentisiaethau »
