Alan yn benderfynol o ddefnyddio’i brofiad personol i helpu eraill
Gan fod Alan Morgan mor ddiolchgar am y gefnogaeth “wych” a gafodd pan oedd yn ddigartref, yn ddi-waith ac yn dioddef o iselder, mae’n awyddus i helpu pobl eraill sy’n wynebu yr un heriau.
Diolch i’r Cynllun Ailddechrau, rhaglen gyflogadwyedd Llywodraeth Cymru, daeth Alan, 55 oed, i gysylltiad â’r darparwr hyfforddiant Itec yn Abertawe a chael help i adfer ei frwdfrydedd, ei hyder a’i synnwyr cyfeiriad.
Ar hyn o bryd, mae ar leoliad gwaith 16 wythnos fel derbynnydd yn y YMCA yn Abertawe, mae Alan wedi ymgeisio am swydd fel gweithiwr cymorth cynorthwyol yn yr hostel.
“Ar ôl bod yn ddigartref fy hunan a gweld sut mae’n gallu digwydd, mae gen i syniad sut mae pobl yn teimlo ac rwy’n awyddus i dalu yn ôl,” meddai Alan, sydd â fflat yn yr Uplands, Abertawe erbyn hyn.
“Mae sefyllfa pawb yn wahanol ond hoffwn i wneud rhywbeth i helpu pobl sydd mewn sefyllfa debyg i’r man lle’r oeddwn i. Rwy’n hoffi sgwrsio â phobl a’u cynghori.”
Gadawodd Alan yr ysgol ag 11 Lefel O a dwy Lefel A a bu’n gweithio i gwmni masnachwyr amaethyddol ac mewn swyddi gweinyddol i gwmnïau siopau cyn treulio saith mlynedd fel paciwr gydag Amazon.
Erbyn hyn, mae’n credu iddo ddechrau dioddef o iselder bum mlynedd yn ôl. Wnaeth e ddim ceisio cymorth ac, ymhen tipyn, teimlai ei fod wedi colli rheolaeth. Collodd bob awydd a mynd mor ynysig fel na fyddai hyd yn oed yn ateb ei ffôn symudol.
Mae Itec wedi helpu Alan i adennill ei hyder ar y Cynllun Ailddechrau. Cafodd help i weld ei wir botensial trwy bennu targedau personol a’u cyflawni. Yn ogystal, cafodd gefnogaeth iechyd meddwl a chyngor ar ddyledion.
Bu ar gyrsiau meithrin hyder, gwasanaethau cwsmeriaid a deall gofalwyr ifanc hefyd. Yn y gorffennol, roedd yn osgoi swyddi lle’r oedd yn dod wyneb yn wyneb â phobl ond, erbyn hyn, mae’n mwynhau ei waith yn y dderbynfa gymaint nes ei fod wedi cynnig dal ati i wirfoddoli pan ddaw’r lleoliad gwaith gyda’r YMCA i ben, tan iddo gael swydd.
“Mae fy mywyd yn well o lawer nawr nag y mae wedi bod ers 20 mlynedd,” meddai Alan. “Mae gen i fflat hyfryd a chymdogion gwych.
“Roedd Debbie Jones a phawb yn Itec a’r Ganolfan Waith yn ddymunol ac yn gefnogol. Roedd yn help mawr i mi gael diweddaru fy CV a chael help i weld y sgiliau sydd gen i. Roeddwn i bob amser yn teimlo’n well ar ôl ein cyfarfodydd.”
Mae Alan yn llawn canmoliaeth i’r gefnogaeth a gafodd gan y Cynllun Ailddechrau. Ei gyngor i bobl sy’n wynebu heriau tebyg i’r rhai a gafodd ef yw i “gyfaddef eich problemau a gofyn am help”.
Mae Debbie Jones, cynghorydd cyflogaeth gydag Itec, wrth ei bodd bod pethau’n mynd yn dda i Alan. “Mae ganddo rywle i fyw a swydd ac mae’n hollol wahanol i’r person oedd e pan gwrddais i ag e gynta – yn isel iawn ei ysbryd ac yn dioddef o orbryder,” meddai.
“Rwy bob amser yn sôn am Alan fel enghraifft o rywun sydd wedi dal ati. Mae bob amser oleuni ym mhen draw’r twnnel. Erbyn hyn mae e’n helpu pobl eraill sy’n ddigartref ac sydd â phroblemau iechyd meddwl.”
Mae’r Cynllun Ailddechrau’n yn rhoi lefel uwch o gefnogaeth i bobl sy’n ddi-waith ers amser hir ac sy’n hawlio Credyd Cynhwysol, i’w helpu i ailddechrau gweithio trwy chwalu rhwystrau i waith.
More News Articles
« Callum, y gweithiwr gofal, yn sôn am fanteision prentisiaethau i bobl ifanc — Cyhoeddi rhestrau byrion Gwobrau Prentisiaethau Cymru eleni »
