Cyllideb ddrafft yn siomi darparwyr prentisiaethau Cymru
Lisa Mytton, Cyfarwyddwr Strategol NTFW
Mae’r corff sy’n cynrychioli darparwyr dysgu seiliedig ar waith ledled Cymru wedi’i siomi nad yw cyllideb ddrafft Llywodraeth Cymru yn addo rhagor o arian i brentisiaethau, yn wahanol i feysydd eraill ym maes addysg a hyfforddiant.
Mae Ffederasiwn Hyfforddiant Cenedlaethol Cymru (NTFW) wedi galw eto am fuddsoddi mwy mewn prentisiaethau ac mae wedi addunedu i gydweithio â Llywodraeth Cymru i gyrraedd nodau sydd ganddynt yn gyffredin, wrth i drafodaethau ar y gyllideb barhau.
Yn gynharach eleni, cafwyd gostyngiad o 14% yng nghyllideb prentisiaethau Llywodraeth Cymru.
Croesawodd Lisa Mytton, cyfarwyddwr strategol yr NTFW, yr ymrwymiad i gadw cyllideb bresennol prentisiaethau gan ddweud:
“Mae hyn yn gydnabyddiaeth glir o rôl hanfodol prentisiaethau er mwyn meithrin gweithlu medrus a chynhwysol.
“Pob clod i Ysgrifennydd y Cabinet dros Gyllid, Mark Drakeford, am ddisgrifio’r gyllideb ddrafft fel ‘cynllun ar gyfer twf’ a ‘chyllideb sy’n amddiffyn pobl agored i niwed’. Dyma egwyddorion sydd wrth galon yr hyn y mae prentisiaethau’n ei gyflawni, gan rymuso unigolion a meithrin gwytnwch mewn cymunedau ledled Cymru.
“Mae’n hanfodol cael cyllid ychwanegol i gyflawni’r pedair blaenoriaeth allweddol a amlinellwyd gan y Prif Weinidog ac i lwyr wireddu potensial trawsnewidiol prentisiaethau wrth gyfrannu at dwf ac amddiffyn pobl sy’n agored i niwed.
“Byddai unrhyw gyllid ychwanegol yn cyfrannu at adfer yr hyn a gollwyd yn ddiweddar oherwydd chwyddiant a thoriadau blaenorol i’r gyllideb.
“Trwy fuddsoddi mwy mewn prentisiaethau, gallwn gydweithio i gynyddu twf economaidd trwy weithlu medrus, hyrwyddo cynhwysiant a symudedd cymdeithasol, mynd i’r afael â phrinder sgiliau diwydiant-benodol a helpu cymunedau i ddod dros heriau economaidd.
“Er ein bod yn deall pam y mae Llywodraeth Cymru’n awyddus i’r gyllideb sydd ar gael i brentisiaethau flaenoriaethu’r Warant i Bobl Ifanc, byddai gwneud hynny â’r gyllideb hon yn achosi rhagor o niwed i’r sector iechyd a gofal cymdeithasol.
“Mae’r NTFW yn dal wedi ymrwymo i gydweithio â Llywodraeth Cymru a rhanddeiliaid eraill i wneud yn siŵr bod prentisiaethau’n parhau i sicrhau manteision ystyrlon i unigolion, busnesau a chymunedau.
“Rydym yn edrych ymlaen at ragor o drafod a chydweithio wrth i ni anelu at nodau sydd gennym yn gyffredin. ”
Mae’n ymddangos bod Llywodraeth Cymru wedi anwybyddu canfyddiadau adroddiad annibynnol a gyhoeddwyd yn ddiweddar yn archwilio effaith eu penderfyniad i dorri cyllideb prentisiaethau.
Mae adroddiad gan y Ganolfan Ymchwil Economeg a Busnes (Cebr), a gomisiynwyd ar y cyd gan yr NTFW a ColegauCymru yn rhagweld y bydd bron 6,000 yn llai o bobl yn dechrau ar brentisiaethau yng Nghymru eleni, gyda cholled dymor byr gysylltiedig o £50.3 miliwn i’r economi, wedi’i fesur mewn Gwerth Ychwanegol Crynswth.
Mae hefyd yn tynnu sylw at y ffaith mai’r sector iechyd a gofal cymdeithasol, ynghyd ag unigolion o ardaloedd difreintiedig, fydd yn dioddef waethaf oherwydd y toriadau hyn.
Mae data a ryddhawyd gan Medr, y Comisiwn Addysg Drydyddol ac Ymchwil yng Nghymru, am y cyfnod Chwefror–Ebrill eleni yn dangos gostyngiad o 445 (34%) yn nifer y dysgwyr a ddechreuodd ddilyn Prentisiaeth Sylfaen mewn Iechyd a Gofal Cymdeithasol o’i gymharu â’r un cyfnod y llynedd. Bu gostyngiad o 160 (27%) yn nifer y rhai a ddechreuodd ar Brentisiaeth.
More News Articles
« Tri Mis Prysur: Cynrychioli Buddiannau ein Rhwydwaith yn y Senedd — Tueddiadau prentisiaethau y byddwn yn eu gweld yn 2025 »
