Cynhadleddd Yn Trafod Trawsnewid Gwaith Cyflenwi Sgiliau Yng Nghymru
Trawsnewid y ffordd o gyflenwi sgiliau yng Nghymru bydd y pwnc trafod pan ddaw darparwyr dysgu seiliedig ar waith ynghyd yn y Vale Resort yn Hensol, ger Caerdydd ar gyfer cynhadledd fawr ar 11 Tachwedd.
Cynhelir cynhadledd flynyddol Ffederasiwn Hyfforddiant Cenedlaethol Cymru (NTfW) eleni ar adeg pan y mae Llywodraeth Cynulliad Cymru’n dymuno trawsnewid y ddarpariaeth addysg a hyfforddiant yng Nghymru mewn cydweithrediad â’r holl randdeiliaid.
Mae NTfW wedi sicrhau cyllid gan Lywodraeth y Cynulliad o dan y gyllideb drawsnewid i annog cynlluniau cydweithio sy’n rhoi mwy o ddewis i ddysgwyr yn y ffordd fwyaf priodol, effeithlon a chost-effeithiol.
Mae Llywodraeth y Cynulliad yn awyddus i weld ysgolion, colegau, prifysgolion a darparwyr dysgu seiliedig ar waith yn cydweithio mewn ffyrdd creadigol i sicrhau mwy o amrywiaeth a chwmpas ehangach wrth gyflenwi sgiliau i ddysgwyr.
Ymhlith y siaradwyr yn y gynhadledd fydd Gweinidog Cymru dros Blant, Dysgu ac Addysg Gydol Oes, Leighton Andrews, AC; Llywydd NTfW, yr Arglwydd Ted Rowlands; Philip Lay, cyfarwyddwr adwerthu S.A. Brain & Co Ltd; Janet Jones, Cadeirydd Ffederasiwn Busnesau Bach Cymru a Dr Geoff Hayward, cyfarwyddwr ymchwil, cyfarwyddwr cyswllt SKOPE, a darllenydd mewn addysg, Adran Addysg Prifysgol Rhydychen.
Bydd Dr Hayward yn trafod y mater “Beth yw pwrpas addysg a hyfforddiant galwedigaethol?” a bydd Mrs Jones yn trafod sgiliau llwyddo o safbwynt busnesau bach.
Yn ogystal, bydd y gynhadledd yn cynnwys wyth gweithdy ar themâu sy’n allweddol i ddyfodol dysgu seiliedig ar waith yng Nghymru. Bydd Bethan Webb, pennaeth polisi cyllid yn Llywodraeth Cynulliad Cymru, yn trafod cyllid ar ôl Awst 2011 a bydd arweinydd prosiect NTfW, Brian Dunlop a’i dîm o swyddogion trawsnewid yn canolbwyntio ar ddod yn hyrwyddwyr llwybrau galwedigaethol.
Fframwaith Credydau a Chymwysterau Cymru (FfCChC) fydd pwnc Jeff Protheroe o NTfW, Trevor Clark, pennaeth FfCChC a Mandy James, rheolwr hyfforddi cenedlaethol City & Guilds.
Bydd Bernard O’Reilly, arolygydd arweiniol Estyn ym maes dysgu seiliedig ar waith a’r Adran Gwaith a Phensiynau yn sôn am ei waith. Bydd Nick Lee, pennaeth datblygiad Adeiladu Sgiliau gyda Llywodraeth y Cynulliad, yn arwain gweithdy ar raglenni cyflogadwyedd at y dyfodol. Dull newydd o gyflenwi prentisiaethau fydd pwnc John Dick, rheolwr gwerthiant cenedlaethol gyda Pearson Work Based Learning.
Trafod sgiliau at y dyfodol mewn dysgu seiliedig ar waith fydd Michelle Creed a Mark Isherwood, cyfarwyddwr a rheolwr sector LLUK yng Nghymru, a bydd Russell Symmons ac Alyson Dacey, cynghorwyr e-ddysgu gydag RSC Cymru, yn dangos sut y gall technoleg hybu cydweithio ar lefel leol, ranbarthol a chenedlaethol.
Dywedodd rheolwr cyffredinol NTfW na ddylai’r un darparwr dysgu sy’n ymwneud â thrawsnewid y ffordd o gyflenwi sgiliau yng Nghymru golli’r gynhadledd.
“Eleni, bydd y gynhadledd yn canolbwyntio ar gyflogadwyedd a golwg y cyflogwr ar yr agenda drawsnewid, gyda chyfraniadau gan Philip Lay, Janet Jones a Dr Geoff Hayward,” meddai.
“Mae cyflogwyr yn gweld gwerth dysgu seiliedig ar waith ac yn dweud yr hoffent gymryd rhan yn y dyfodol. Maen nhw’n awyddus i glywed sut y gallwn ni eu helpu i sicrhau’r trawsnewid hwnnw.”
Os hoffech gadw lle yn y gynhadledd, gallwch e-bostio ntfwevent@cazbah.biz neu ffonio 0844 736 2651.
Mae NTfW yn rhwydwaith o 97 o ddarparwyr hyfforddiant gyda sicrwydd ansawdd ledled Cymru sy’n gweithio o dan gontract i Lywodraeth Cynulliad Cymru i gyflenwi gwerth £121 miliwn o raglenni dysgu seiliedig ar waith o ddyraniad cyfan o £127 miliwn.
Mae gan y rhwydwaith gysylltiadau â 35,000 o gyflogwyr ledled Cymru ac mae’n cynnwys darparwyr dysg yn y sector annibynnol, awdurdodau lleol, sefydliadau addysg bellach, a’r sector gwirfoddol.
More News Articles
« Cynllun i gynnig hyfforddiant cost-effeithiol – yr Arglwydd Ted Rowlands, Llywydd, NTfW — Cynhadledd i hybu hyfforddiant sgiliau yng Nghymru »