Grow and Save yn mynd â’r wobr uchaf yn Rownd Derfynol yr Her Arian am Oes
Sarah Poretta, Pennaeth y Rhaglen Arian am Oes yn Lloyds Banking Group, gydag aelodau tîm Grow and Save Friha Nawaz, Mohima Bib, Farhin Begum, Shezmin Begum ac Aisya Ashraf.
Sgiliau rheoli arian pobl ifanc Caerdydd yn cael eu cydnabod yn rownd derfynol Cymru o gystadleuaeth fawreddog
Mae tîm o bobl ifanc o Gaerdydd yn dathlu llwyddiant heddiw ar ôl cael eu coroni’n enillwyr yn rownd derfynol Her Arian am Oes Cymru Lloyds TSB, sef cystadleuaeth ledled y DU sydd wedi’i dylunio i ysbrydoli gwell sgiliau rheoli arian mewn cymunedau.
Brwydrodd y tîm o ddysgwyr rhwng 17 ac 19 oed gystadleuaeth o bob cwr o Gymru yn y seremoni yng Nghaerdydd ddoe gyda’u prosiect arloesol i ddarparu pecynnau i helpu pobl i arbed arian trwy dyfu eu ffrwythau, eu llysiau a’u perlysiau eu hunain. Llwyddodd eu prosiect i argyhoeddi’r beirniaid o allu arobryn y tîm nid yn unig i wella’u sgiliau rheoli arian eu hunain, ond i ddefnyddio’r rhain i gael effaith gadarnhaol ar eu cymuned leol.
Bydd Grow and Save o ITEC Training Solutions bellach yn symud ymlaen i Rownd Derfynol Fawreddog Her Arian am Oes y DU yng Nghanol Llundain ar 23 Mai, lle byddant yn cystadlu yn erbyn timau o’r Alban, Gogledd Iwerddon a Lloegr i hawlio teitl enillwyr cyffredinol yr Her Arian am Oes. Yn ogystal, mae’r bobl ifanc wedi ennill £1,000 i’w rhoi i elusen o’u dewis a thalebau siopa gwerth £50 i bob aelod o’r tîm.
Dywedodd Farhin Begum, 19 oed, o Grow and Save: “Rydym wrth ein boddau o ennill y wobr. Mae wedi rhoi hwb hyd yn oed mwy i’n hyder ni ac rydym yn mynd i barhau i ddatblygu’r prosiect. Bwriadwn ei ehangu o 20 ysgol gynradd a meithrinfa yng Nghaerdydd i ysbytai, hosteli a chartrefi i’r henoed.”
Dywedodd noddwr y tîm, Annabel Fuidge, mentor y tîm o ITEC Training Solutions: “Rydw i mor falch o’r merched. Maen nhw wir wedi ymddiddori yn y prosiect ac maen nhw am barhau i’w datblygu. Byddwn yno bob cam o’r ffordd.”
Dywedodd Sarah Porretta, Pennaeth y Rhaglen Arian am Oes yn Lloyds Banking Group: “Mae’n bleser gennym gyhoeddi mai Grow and Save yw enillwyr rownd derfynol Her Arian am Oes Cymru. Crëwyd argraff fawr ar ein beirniaid trwy’r ffordd y cymerodd y tîm syniad syml a’i ddatblygu mor bell yn eu cymuned. Mae tyfu perlysiau a llysiau yn eich gardd neu ar sil eich ffenestr yn hawdd ei wneud a bydd yr arbedion a wnewch wir yn adio i fyny.
“Mae’r Her Arian am Oes bellach yn ei hail flwyddyn ac mae’n ysbrydoledig gweld cynifer o bobl ifanc yn cael eu grymuso i ddysgu ffyrdd newydd o reoli eu harian yn dda a chefnogi pobl eraill trwy basio’r sgiliau hyn ymlaen.
“Edrychwn ymlaen at groesawu Grow and Save i Rownd Derfynol Fawreddog y DU ar 23 Mai a dymunaf bob lwc iddynt.”
Bydd y tîm buddugol yn Rownd Derfynol Fawreddog y DU ar 23 Mai yn ennill mentor Lloyds Banking Group, £2,500 ar gyfer elusen o’u dewis a £100 o dalebau siopa i bob aelod o’r tîm. Yn ogystal, bydd enillydd cyffredinol Gwobr y Bobl yn cael ei dewis gan westeion i’r digwyddiad.
Roedd y panel beirniaid yn cynnwys Simon Farrington, golygydd y Wales on Sunday a’r golygydd datblygu busnes ar gyfer Media Wales, Essex Havard, cydlynydd ymgyrchoedd a chodi arian Niace Dysgu Cymru, Mike Lewis, cysylltydd busnes BITC sydd ar secondiad o Lloyds Banking Group, Stephanie Lloyd, llywydd UCM
Cymru a Garin Wilcock o Goleg Catholig Dewi Sant. Dewisodd y panel Grow and Save o restr fer o bum tîm ledled Cymru.
Roedd y rhai eraill a gyrhaeddodd y rownd derfynol yn cynnwys:
- Quit and Sav£, tîm o bobl 16 i 18 oed o Goleg Ystrad Mynach sydd wedi dynodi’r cyfleoedd arbed arian a’r manteision o dorri i lawr ar ysmygu neu roi’r gorau i ysmygu.
- Sk8 Swap Shop, tîm o bobl 16 i 23 oed o Brosiect Ieuenctid Caerfyrddin, sy’n hyrwyddo rheolaeth ar arian trwy siop gyfnewid, gan wahodd aelodau o’r gymuned i’w digwyddiad i gyfnewid eu nwyddau.
- Rampart Rebels, tîm o bobl 16 i 19 oed o’r Ganolfan Hyfforddiant Cyflogaeth yn Abertawe. Nod ei brosiect yw rhoi gwybod i’r cyhoedd am fenthycwyr arian didrwydded yn y ddinas. Enillodd Rampart Rebels Wobr y Bobl yn y rownd derfynol.
- Swimming with the Sharks, tîm o bobl 16 i 17 oed o Goleg Castell-nedd Port Talbot, sy’n codi ymwybyddiaeth o beryglon benthyg arian gan fenthycwyr arian didrwydded a rhoi gwybodaeth am ffyrdd eraill o fenthyg arian.
Mae’r Her Arian am Oes yn rhan o’r rhaglen Arian am Oes, sef partneriaeth unigryw rhwng Lloyds Banking Group a phartneriaid sector addysg bellach ym mhedair gwlad y DU, gan gynnwys ColegauCymru / CollegesWales a Ffederasiwn Hyfforddiant Cenedlaethol Cymru. Nod y gystadleuaeth yw dod o hyd i’r ffyrdd mwyaf llwyddiannus ac arloesol o wella sgiliau rheoli arian y dysgwyr, eu ffrindiau, eu teuluoedd a’u cymunedau. Mae aelodau’r tîm rhwng 16 a 24 oed ac mewn addysg bellach, dysgu seiliedig ar waith neu ddysgu oedolion yn y gymuned.
I gael mwy o wybodaeth am yr Her Arian am Oes, ewch i moneyforlifechallenge.org.uk, neu ymunwch â ni ar Facebook yn www.facebook.com/moneyforlifeuk ac ar Twitter yn www.twitter.com/moneyforlifeuk
More News Articles
« Gwobr y Bobl yn Rownd Derfynol yr Her Arian am Oes — Cyfle i Grow and Save ennill prif wobr Her Arian am Oes yn Rownd Derfynol y Deyrnas Unedig »
