Prentisiaid cwmni o Gaerdydd yn anelu’n uchel
Mae prentisiaid British Airways Maintenance Cardiff (BAMC) yn anelu’n uchel yn y diwydiant awyrennau.
Bu’r cwmni’n addasu ei drefniadau dysgu seiliedig ar waith dros y blynyddoedd diwethaf ac erbyn hyn mae ei raglen brentisiaethau’n creu llif o dalent er budd y sector cyfan.
Yn awr, mae’r cwmni wedi cyrraedd y rhestr fer ar gyfer Gwobr Cyflogwr Mawr y Flwyddyn yng Ngwobrau Prentisiaethau Cymru fis nesaf, sef y dathliad blynyddol o lwyddiant eithriadol mewn hyfforddiant a phrentisiaethau.
Mae tri deg pedwar o unigolion a sefydliadau, mewn dwsin o gategorïau, ar y rhestrau byrion ar gyfer y gwobrau a gyflwynir mewn seremoni fawreddog yng Nghanolfan Gynadledda Ryngwladol newydd Cymru, Casnewydd ar 24 Hydref.
Bwriad y gwobrau yw tynnu sylw at lwyddiant dysgwyr, cyflogwyr, tiwtoriaid ac aseswyr gorau Cymru sydd wedi rhagori wrth gyfrannu at ddatblygiad rhaglenni Llywodraeth Cymru ym maes Hyfforddeiaethau a Phrentisiaethau.
Trefnir Gwobrau Prentisiaethau Cymru ar y cyd gan Lywodraeth Cymru a Ffederasiwn Hyfforddiant Cenedlaethol Cymru (NTfW) a’r prif noddwr eleni yw Openreach, busnes rhwydwaith digidol y Deyrnas Unedig. Caiff y Rhaglen Brentisiaethau ei hariannu gan Lywodraeth Cymru gyda chymorth Cronfa Gymdeithasol Ewrop (ESF).
Ers i BAMC gyflwyno’r rhaglen brentisiaethau 10 mlynedd yn ôl, bu’n cydweithio â’r darparwr hyfforddiant, Coleg y Cymoedd, i gynnwys modiwlau diwydiant-benodol sy’n cynnig profiad gyda’r gorau yn y byd i’w brentisiaid yn lle mathau hyfforddiant nad oedd yn berthnasol i’r sector.
Mae’r cwmni’n credu’n gryf mai BTEC Lefel 3 a diploma estynedig NVQ mewn Peirianneg Awyrenegol yw’r llwybr gorau i bobl ifanc sydd â diddordeb mewn gyrfa mewn cynnal a chadw awyrennau, er mwyn iddynt ddod yn beirianwyr cymwys a medrus.
“Yn ogystal â darparu’r sgiliau technegol y mae ar ein prentisiaid eu hangen, mae ein rhaglen ni’n rhoi profiadau bywyd iddynt,” meddai Nerys Jones, Cydlynydd Adnoddau Dynol/Arweinydd y Rhaglen Brentisiaethau.
“Er enghraifft, mae ein prentisiaid wedi cael profiad o wahaniaethau ddiwylliannol a thechnolegol rhwng sefydliadau peirianyddol trwy ymweliadau cyfnewid â Chengdu a gwahanol wledydd yn Ewrop.
“Ein nod yw cynnig prentisiaeth iddynt a fydd yn agor y drws i unrhyw sefydliad cynnal a chadw arall. Yn aml, gwelwn fod ein cyn-brentisiaid yn dod yn ôl atom a’n bod yn elwa ar y profiad a gawsant gyda chwmnïau eraill.”
O ganlyniad i berthynas gadarn BAMC gyda Choleg y Cymoedd, mae 86 o brentisiaid wedi graddio dros y pum mlynedd diwethaf.
“Mae BAMC wedi buddsoddi’n sylweddol er mwyn datblygu profiad sydd gyda’r gorau yn y byd i brentisiaid,” meddai Stephen Manning, Asesydd NVQ Dysgu Seiliedig ar Waith yng Ngholeg y Cymoedd.
“Trwy gydweithio’n agos, rydym wedi llwyddo i addasu’r fframwaith prentisiaethau er mwyn canolbwyntio ar ddysgu sgiliau sy’n wirioneddol werthfawr yn y diwydiant ac a fydd yn ddefnyddiol iddynt yn y dyfodol.”
Llongyfarchodd Ken Skates, Gweinidog yr Economi a Thrafnidiaeth, BAMC a phawb arall oedd ar y rhestrau byrion.
“Mae rhaglenni Prentisiaethau a Hyfforddeiaethau Llywodraeth Cymru yn helpu i sicrhau bod rhagor o bobl yn datblygu’r sgiliau a’r profiad y gwyddom fod ar fusnesau eu hangen ym mhob sector o’r economi yng Nghymru,” meddai.
“Mae Gwobrau Prentisiaethau Cymru’n gyfle gwych i ddathlu ac arddangos llwyddiant yr unigolion a’r sefydliadau disglair sy’n ymwneud â’r rhaglenni hyn, o brentisiaid a chyflogwyr, i ddarparwyr hyfforddiant a hyfforddeion.”
More News Articles
« Carrie-Anne yn blodeuo er gwaetha’i thrafferthion a’n cyrraedd y rhestr fer am Wobr — Legal and General, sydd ar y rhestr fer am wobr, yn creu diwylliant o ddysgu »