Llwyddiant swydd yn dilyn medal Aur yng Nghystadleuaeth Sgiliau Cymru
Katie Pierce
Yn dilyn ennill aur yng Nghystadleuaeth Sgiliau Cymru fis Mawrth eleni, a chyfweliad llwyddiannus, mae Katie Pearce o Bontprennau wedi cael cynnig swydd lawn amser fel Cynghorydd Gwasanaeth Cwsmeriaid yn Itec Skills.
Enillodd Katie, a adawodd yr ysgol heb unrhyw gymwysterau TGAU, y fedal aur yn y gystadleuaeth Sgiliau Cynhwysol: Gwasanaeth Cwsmeriaid, dangos y sgiliau a’r priodoleddau allweddol sydd eu hangen mewn gwasanaeth cwsmeriaid, a sut i roi profiad da i gwsmeriaid.
Roedd y gystadleuaeth yn cynnwys tair tasg: cynhyrchu ymateb e-bost ysgrifenedig i gwestiynau a godwyd gan gwsmeriaid, cynhyrchu ymateb ysgrifenedig i ddau gwestiwn yn ymwneud â hanfodion gwasanaeth cwsmeriaid, ac ymdrin â dwy sefyllfa chwarae rôl wahanol.
Gwelodd Cystadleuaeth Sgiliau Cymru 2023 dros 1000 o bobl ifanc o ledled Cymru yn cystadlu ar draws pum sector: Adeiladu a Seilwaith, Peirianneg a Thechnoleg, Iechyd, Lletygarwch a Ffordd o Fyw, TG a Menter a’r Cyfryngau a Chreadigol. Dyfarnwyd cyfanswm o 101 o fedalau aur eleni.
I ddathlu gwobr Katie, cynhaliodd Canolfan Sgiliau Itec yng Nghaerdydd ddigwyddiad personol i Katie a’i theulu ei fynychu.
Ar ôl y seremoni wobrwyo, er mawr syndod i Katie, cynigiodd Itec swydd barhaol iddi fel Cynghorydd Gwasanaeth Cwsmer gyda nhw yn dilyn cyfweliad llwyddiannus yn gynharach yn yr wythnos.
Wrth siarad yn y digwyddiad, dywedodd Katie: “Rwyf mor falch ohonof fy hun am ennill y wobr aur. Mwynheais fod yn rhan o Gystadleuaeth Sgiliau Cymru a mwynheais yn arbennig yr elfennau chwarae rôl o’r gystadleuaeth a roddodd gyfle i mi arddangos y sgiliau rwyf wedi’u dysgu ers ymuno ag Itec.”
Dechreuodd Katie ar ei thaith Itec ym mis Medi 2020 ar raglen Ymgysylltu Twf Swyddi Cymru + lle cwblhaodd ddau gymhwyster. Yna sicrhaodd Katie leoliad gyda Sefydliad Prydeinig y Galon lle datblygodd broffesiynoldeb, amynedd, ac agwedd “pobl yn gyntaf”, gan danio ei hangerdd am wasanaeth cwsmeriaid.
Wrth i hyder Katie dyfu, gyda lleoliad pellach yn Harry Harper Sales and Letting, enillodd gymwysterau ychwanegol gan gynnwys Dyfarniad Rhagarweiniol Lefel 1 mewn Gwasanaeth Cwsmer a Dyfarniad Lefel 1 mewn Sgiliau Cyfathrebu.
Dywedodd Adele Hughes, Rheolwr Gweithrediadau Itec:“Rydym wrth ein bodd gyda Katie, mae ei gwaith caled a’i hymroddiad wedi talu ar ei ganfed. Mae ei phroffesiynoldeb a’i sgil wrth ymdrin â chwsmeriaid wedi ennill y brif wobr iddi yng Nghystadleuaeth Sgiliau Cymru, ac mae’n fodel rôl wych i ddysgwyr eraill sy’n dilyn cymwysterau tebyg. Llongyfarchiadau enfawr i Katie, a’i theulu.”
Dywedodd cyfarwyddwr prosiect Ysbrydoli Rhagoriaeth Sgiliau yng Nghymru, Paul Evans: “Rydym wrth ein bodd dros Katie, mae bod y gorau yng Nghymru yn eich sgil ac mae cael cynnig swydd barhaol yn ei dewis faes oddi ar ei gefn yn wych.”
“Mae stori Katie yn dyst i’r buddion y gall cystadlaethau sgiliau eu cael o ran cynyddu cyflogadwyedd a datblygiad sgiliau pobl ifanc, ac wrth i nifer cystadleuwyr CSC gynyddu, rydym yn gobeithio clywed mwy o straeon fel hyn.”
Darganfod mwy am Gystadleuaeth Sgiliau Cymru.
More News Articles
« Lansio Cynllun Sgiliau a Chyflogaeth Partneriaeth Sgiliau Rhanbarthol Gogledd Cymru — Prentisiaethau’n chwarae rhan hanfodol yn llwyddiant becws Danaidd »
