Cymru i gynnal Rowndiau Terfynol Cenedlaethol WorldSkills UK 2025
Mae WorldSkills UK wedi cyhoeddi y bydd yn partneru â Llywodraeth Cymru ac Inspiring Skills Excellence i gynnal Rowndiau Terfynol Cenedlaethol WorldSkills UK 2025 yng Nghymru am y tro cyntaf erioed.
Bydd Cymru’n paratoi i groesawu talent gorau’r DU fis Tachwedd nesaf ar gefn rownd derfynol hynod lwyddiannus yn Lyon ym mis Medi, pan ddaeth dau gystadleuydd o Gymru â gwobrau adref. Cipiodd Ruben Duggen Arian mewn Plymwaith, a phleidleisiwyd Ruby Pile y Gorau yn y Genedl am ei phroffesiynoldeb yn y Gwasanaethau Bwyty.
Dywedodd Gweinidog Sgiliau Llywodraeth Cymru, Jack Sargeant:
“Fel cyn-brentis fy hun, roedd ennill wrth ddysgu yn newid y gêm i mi a phrentisiaid fel Ruben.
Rwy’n falch y bydd Cymru yn cynnal Rowndiau Terfynol WorldSkills UK 2025.
Rwy’n siŵr y bydd cyflawniad Ruben eleni a chroesawu’r gystadleuaeth genedlaethol yma y flwyddyn nesaf yn ysbrydoli llawer o ddarpar brentisiaid Cymreig y dyfodol.”
Bydd lleoliadau ar draws De Cymru yn cynnal Rowndiau Terfynol Cystadleuaeth WorldSkills UK blynyddol o 25 – 28 Tachwedd, 2025. Dyma’r tro cyntaf i’r digwyddiad gael ei gynnal yng Nghymru.
Yn cael ei ystyried yn rhan annatod o’r calendr addysg a hyfforddiant ôl-16, mae Cystadlaethau WorldSkills UK yn denu dros 6,000 o gofrestriadau o bob rhan o Loegr, yr Alban, Cymru a Gogledd Iwerddon yn flynyddol. Mae’r rhaglenni hyfforddi sy’n seiliedig ar gystadleuaeth yn rhoi cyfleoedd i sefydliadau addysg a chyflogwyr ddatblygu a meincnodi galluoedd eu myfyrwyr a’u prentisiaid yn erbyn safonau rhyngwladol
Dywedodd Ben Blackledge, Prif Weithredwr, WorldSkills UK:
“Bydd yn wych dod â Rowndiau Terfynol Cenedlaethol WorldSkills y DU i Dde Cymru y flwyddyn nesaf.
“Mae ein rhaglenni cystadlaethau sgiliau yn ganolog i hybu rhagoriaeth mewn addysg dechnegol, gan helpu dysgwyr i ddangos eu parodrwydd ar gyfer swyddi medrus iawn mewn sectorau sy’n hanfodol i economi’r DU. Gan weithio gyda’n partneriaid yng Nghymru byddwn yn dathlu technegwyr ifanc gorau’r DU ac yn tynnu sylw at y rôl y mae sgiliau o’r radd flaenaf yn ei chwarae yn ein heconomi.”
Dywedodd Mike James, Ymddiriedolwr a Phrif Weithredwr WorldSkills UK, Grŵp Coleg Caerdydd a’r Fro:
“Mae cynnal Rowndiau Terfynol Cenedlaethol WorldSkills y DU yn gyfle gwych nid yn unig i Gymru, ond i’r DU gyfan ddod ynghyd a thynnu sylw at ragoriaeth sgiliau. .
“Fel Ymddiriedolwr WorldSkills UK a Phennaeth Coleg rwy’n gweld â’m llygaid fy hun y rhan ganolog y mae’r Rowndiau Terfynol Cenedlaethol yn ei chwarae wrth ddod ag addysg, diwydiant a llywodraethau ynghyd i feincnodi, rhannu arfer gorau ac amlygu pwysigrwydd hyfforddiant sgiliau o ansawdd uchel. Edrychwn ymlaen at arddangos y cyfleusterau rhagorol sydd gennym yma yng Nghymru a chroesawu myfyrwyr a phrentisiaid o bob rhan o’r DU.”
Yn ystod y Rowndiau Terfynol Cenedlaethol, bydd pobl ifanc o bob rhan o’r DU yn cael eu profi mewn sgiliau mor amrywiol â Chynnal a Chadw Awyrennau, Celf Gêm Ddigidol 3D, Weldio ac Iechyd a Gofal Cymdeithasol, Coginio a Gosodiadau Trydanol. Gellir ystyried y rhai sy’n rhagori i gynrychioli’r DU mewn Cystadlaethau WorldSkills rhyngwladol yn y dyfodol.
Dywedodd Paul Evans, Llysgennad Sgiliau Cymru a Chyfarwyddwr Prosiect Ysbrydoli Rhagoriaeth Sgiliau:
“Rydym yn hynod falch o ddod â Rowndiau Terfynol Cenedlaethol WorldSkills y DU i Gymru yn 2025
“Gwyddom o’n cyfranogiad cryf yng Nghymru fod gweithgaredd cystadlu yn cynnig cyfleoedd i bobl ifanc newid bywydau. Mae’n dod â mantais gystadleuol i gyflogwyr ac yn ehangu gwybodaeth ac arbenigedd ar draws y sector addysg a hyfforddiant.
“Rydym yn edrych ymlaen at ddathlu sgiliau technegol a chroesawu’r goreuon o bob rhan o’r DU i ddigwyddiad eithriadol.”
Cynhelir Rowndiau Terfynol Cenedlaethol WorldSkills y DU eleni rhwng 19 a 22 Tachwedd mewn lleoliadau ar draws Manceinion Fwyaf. Bydd Grŵp Colegau Manceinion Fwyaf, a weithiodd mewn partneriaeth â WorldSkills UK i gynnal y Rowndiau Terfynol yn 2023 a 2024, yn trosglwyddo’r ‘baton’ i Ysbrydoli Rhagoriaeth Sgiliau yng Nghymru yn Seremoni Medalau eleni a gynhelir yn Neuadd Bridgewater ar 22 Tachwedd.
Ysbrydoli Rhagoriaeth Sgiliau yng Nghymru
More News Articles
« Darparwr prentisiaethau ledled Cymru yn dathlu adroddiad disglair Estyn — Dau brentis pobi o Gymru wedi’u henwebu ar gyfer Gwobr Rising Star yng Ngwobrau Diwydiant Pobi’r DU 2024 »
