Kiera’n goresgyn anawsterau gan wneud prentisiaeth er mwyn helpu cleifion
Mae technegydd fferyllol o’r enw Kiera Dwyer wedi dangos penderfyniad, ymroddiad ac ymrwymiad wrth sicrhau cyfres o gymwysterau i gefnogi ei gwaith mewn fferyllfa gymunedol yn Abercynon.
Kiera’n goresgyn anawsterau gan wneud prentisiaeth er mwyn helpu cleifion.
Mae Kiera, 24, o Rydyfelin, Pontypridd, sydd â Syndrom Asperger ac Irlen, a elwir hefyd yn straen gweledol, wedi cymryd cyfrifoldeb ychwanegol er mwyn rhoi mwy o amser i fferyllwyr yn Fferyllfa Sheppards, sy’n rhan o grŵp Avicenna, i ymdrin â chleifion. O ganlyniad i hyn, mae’r fferyllfa wedi cael sgôr o hyd at 100% gan gleifion.
Mae wedi cwblhau Prentisiaeth Rhaglen Hyfforddi Technegwyr Fferylliaeth Cyn-gofrestru a oedd yn cynnwys Diploma BTEC Lefel 3 mewn Gwyddor Fferyllol trwy’r corff dyfarnu Pearson, a City & Guilds Lefel 3 mewn Sgiliau Gwasanaethau Fferylliaeth.
Cyflwynwyd y brentisiaeth gan Addysg a Gwella Iechyd Cymru (AaGIC) gyda chefnogaeth ALS Training.
I gydnabod ei hymroddiad i ddysgu, mae Kiera wedi cyrraedd rhestr fer gwobr Prentis y Flwyddyn yng ngornest fawreddog Gwobrau Prentisiaethau Cymru 2022. Cyhoeddir enwau’r enillwyr mewn seremoni wobrwyo rithwir ar 10 Tachwedd.
Mae’r gwobrau’n tynnu sylw at y rhyfeddodau y mae cyflogwyr, prentisiaid ac ymarferwyr dysgu seliedig ar waith wedi’u cyflawni yn y cyfnod anodd hwn.
Y gwobrau yw uchafbwynt y flwyddyn i brentisiaid, cyflogwyr, a darparwyr ac ymarferwyr dysgu seiliedig ar waith. Cânt eu trefnu gan Lywodraeth Cymru a’u cefnogi gan Ffederasiwn Hyfforddiant Cenedlaethol Cymru (NTfW). Eleni, am y drydedd flwyddyn, Openreach yw’r prif noddwr.
Er mwyn dod dros y straen gweledol a achosir wrth ddarllen testun ar bapur gwyn, buddsoddodd Kiera mewn pad Irlen Pukka porffor ac ailysgrifennu darnau hanfodol o wybodaeth yr oedd angen iddi eu hadolygu. Roedd hyn yn golygu ei bod yn gallu rhoi’r gorau i weithio ar amser rhesymol yn hytrach na bod wrth y gwaith tan 3am.
Dechreuodd ar ei phrentisiaeth ychydig cyn y pandemig a daliodd ati i weithio ar reng flaen y GIG yn y fferyllfa i sicrhau bod cleifion yn derbyn meddyginiaethau hanfodol.
Yn ogystal ag ymdopi â’r pandemig, bu’n rhaid i Kiera ddelio â nifer o ddigwyddiadau teuluol trawmatig, gan gynnwys colli ei thad-cu a oedd yn annwyl iawn ganddi. Er gwaethaf hyn, ni chollodd yr un o ddyddiadau cau ei chymwysterau.
“Roeddwn i eisiau gwneud prentisiaeth er mwyn gallu cymhwyso’r wybodaeth rydw i’n ei dysgu, yn cynnwys sut y gall cyflyrau meddygol effeithio ar gleifion a sut mae gwahanol ddosbarthiadau cyffuriau’n gweithio mewn gwahanol ffyrdd,” esboniodd Kiera.
“Fe wnes i oresgyn llawer o rwystrau i gwblhau fy mhrentisiaeth ac roedd anawsterau’n fy wynebu o’r cychwyn cyntaf. Er gwaethaf hyn, llwyddais i gyrraedd yr ochr draw gan gwblhau fy nghymwysterau BTEC ac NVQ yn ogystal â fy mhrentisiaeth.”
Dywedodd Rhiannon Burke, rheolwr yn Fferyllfa Sheppards: “Mae Kiera wedi rhoi ei chefnogaeth gyson i’r fferyllfa trwy dynnu’r pwysau oddi ar y fferyllwyr a helpu i leihau eu llwyth gwaith nhw.
“Mae hi’n haeddu cael ei chydnabod am fod yn benderfynol, yn ymroddedig a dangos ymrwymiad, ac am fod mor fedrus wrth ennill ei chymhwyster.”
Wrth longyfarch Kiera a phawb arall ar y rhestrau byrion, dywedodd Vaughan Gething, Gweinidog yr Economi: “Mae prentisiaethau’n gwneud cyfraniad enfawr at ein heconomi a byddant yn hollbwysig wrth i Gymru barhau i ddod dros y pandemig.
“Gallant helpu i baratoi gweithlu at y dyfodol, ei ysgogi a sicrhau amrywiaeth, gan roi cyfle i bobl ennill sgiliau galwedigaethol o safon uchel.
“Fel rhan o’n Gwarant i Bobl Ifanc, bydd Llywodraeth Cymru’n buddsoddi £366 miliwn dros y tair blynedd nesaf i ddarparu 125,000 o brentisiaethau bob-oed ledled Cymru yn ystod tymor presennol y llywodraeth.
“Rydyn ni’n awyddus i wella cyfleoedd i bobl o bob oed a phob cefndir i ddatblygu sgiliau trosglwyddadwy yn y gweithle a gwella’u bywydau. Yn ogystal, bydd y buddsoddiad yn helpu i fynd i’r afael â phrinder sgiliau a bylchau mewn sgiliau yn y sectorau blaenoriaeth. Mae hyn yn hollbwysig er mwyn hybu cynhyrchiant a thwf economaidd, gan gefnogi ein huchelgeisiau sero net, yr economi sylfaenol a gwasanaethau cyhoeddus.”
Caiff y Rhaglen Brentisiaethau ei hariannu gan Lywodraeth Cymru gyda chymorth Cronfa Gymdeithasol Ewrop (ESF). Os hoffech wybod rhagor am recriwtio prentis, ewch i: llyw.cymru/prentisiaethau-dewis-doeth neu ffonio 03000 603000.
More News Articles
« Canmoliaeth loyw i gyfraniad Olivia, sy’n brentis, i’r bwrdd iechyd — Prentisiaethau’n helpu James i yrru ei yrfa ymlaen yng Nghlwb Golff Maesteg »
